Washington, Jylliew:
U President ka America, U Donald Trump, u la iaroh ïa U Narendra Modi, myntri rangbah duh jong ka ri, hadien ba kitei ki arngut ki nongialam, ki la iakynduh ha shilynter jong ka jingialang jong ka G7 ha France. Ha ka jingkren jong u Trump ha ka por ba ïa bam ja sngi hapdeng ka jingsangeh ba shipor jong katei ka jingialang, u la ong ba um long uba jai jai kum u PM Modi.
“Ym kum u PM Modi, uba jemnud, uba jai-jai bad u long pat ruh uba shyrkhei, ngam long kumta. Peit ïa u,” u la ong katba ki arngut ki nongialam ki dang pynkhreh ïa ka jingiakren ha rud jong ka jingialang jong ka G7.
Baroh arngut ki nongïalam kin pynlong ïa ki jingïakren halor ka jingroi ka ioh ka kot, ki lad pynpoi marbam, ka jingstad thymmai (AI), ki jingïatreilang ha ka jingbei tyngka, bad ki jingeh bapher bapher ha ka jingïada ha ka pyrthei.
Kham hashwa jong katei hi ka Sngi Ba-ar, u PM Modi bad u Trump ki la ïakynduh bad ïa ai khublei ha shilynter jong ka jingïalang paidbah jong ka G7 Summit ha Evian jong ka France.
Baroh arngut ki nongïalam ki la ïakdup kti bad ïakren lyngkot shwa ka jingïalang treikam jong ka G7 halor ka ‘Ka Jingthaw ïa ki Jingiatreilang Bathymmai bad Ka Jingtei Biang ïa ka jingïatylli hapdeng ka Pyrthei’, kaba la ïashim bynta da ki ri G7, ki ri kiba ïatreilang, ka World Bank, bad ka African Development Bank.
Ha kaba sdang jong une u bnai, une u nongïalam ka Republican u la ai khublei ïa u PM Modi uba la long u myntri rangbah duh jong ka India uba la bat slem tam. Haba shim ïa ka social media platform jongu, ka Truth Social, U Trump, ula kdew ïa u PM Modi, kum u paralok jongu bad ula khot ïa u, u myntri rangbah duh jong ka Ri “ba khraw”.
“Khublei ïa u paralok jong nga, u Myntri Rangbahduh u Narendra Modi, uba la long u Myntri Rangbahduh jong ka ri India uba la shakri slem tam – Bad u long uba khraw!” U Trump u la thoh.
U la bynrap shuh shuh ïa katei ka post da kaba ong ba u PM Modi u dei u briew uba khlaiñ, uba koit ba khiah, bad uba stad bad uba don bun snem jong ka jingkhraw bad jingjop ha khmat jong u.
