Rafah, Jymmang:
Katkum ki khubor la ong ba ki shipai ka Israel ki la ther bom biang sha Gaza ha ka Sngi U Blei, hynrei ki heh ka Israel pat ka la pyntip ba ka long ba la kloi ban iakren ïasuk bad ka la pynkhreh ban iakren ïasuk noh bad ka Hamas ha kane ka por.
Kumta, la ong ba la iohi ia ki ‘namding kiba suh nalor suiñ sha kylleng ki bynta jong ka nongbah Gaza khamtam hapoh Rafah katba ki shipai ka Israel ki dang ther bom sha ka phang Shatei bad Pdeng bad kumjuh ruh sha Shathie jong ka Gaza ha katei ka miet Sngi U Blei. Kane ka jingleit hiar thma jong ka Israel ka la neh mynta la hynriew bnai kynthih wat hapdeng ka jingpynbor jong ki tnat bapher bapher ia ka Israel ba ka dei ban sangeh noh ia ka thma. Kumjuh ruh la ong ba ka jinghiar thma jong ka Israel ia ka Gaza, ka la pynlong ia ka Egypt ruh
ba kan khang noh ia u khappud jong ka bad ka Gaza na ka phang ba markhap bad ka nongbah Rafah. Hynrei ha katei ka Sngi U Blei, la ong ba ki trok kiba kit ia ki jingiarap ba la phah da ka UN na ka bynta ki paidbah ka Gaza, ki la leit ban poi sha katei ka bynta khappud jong ka Egypt bad ka Gaza hadien ba ka Egypt ka la mynjur ia ka jingtyrwa jong ka US ban ailad ban rung na katei ka bynta khappud jong ka khnang ban ioh ban pynpoi ia kitei ki lad jingiarap sha ki paidbah nongshong shnong jong ka Gaza wat hapdeng ka thma jong ka Israel bad ki Hamas kaba dang iai bteng man la ka sngi.
Kumjuh ruh u President ka United States- u Joe Biden ha ka Sngi Saitjaiñ jong kane ka taiew ba la leit, u la pyntip ba ka sorkar US ka la ialeh katba lah ban pyniasuk noh ia ka Israel bad ka Hamas bad ban ioh pyllait noh ruh ia baroh kito kiba la shah rahbor ha ka Hamas khnang ban tehlakam ia ki jingma kiba khraw kiba ap na ka thma Israel bad kaba la ktah jur ia ka pyrthei baroh kawei.
