Shillong, Jymmang 27
U Andy Murray u la ong ba u dap da ka jingsngewsarong hadien ka jingïaid lynti ka jong u ha ka French Open ka la poi sha kaba kut ha ka Sngi U Blei hadien ba shah rem noh tang ha ka wat kaba nyngkong ha u lahduh jong u 2015 bad uba la bat lai sien ïa ka nam Grand Slam u Stan Wawrinka.
U Murray, uba la wan ba-ar ha Roland Garros ha 2016, u la shah rem da 6-4, 6-4, 6-2 ha ka jingïakhun para marwei jong kane ka lympung shwa ba un sa shong-thait noh mynta u snem.
Une u rangïalehkai ba la 37 snem ka rta u la dep ban pynbna ïa ka jingthmu ban shongthait noh na ka kam ïalehkai ha kane ka aïom lyiur ha kaba ka Wimbledon bad ka Paris Olympics ki long ki ar tylli ki lympung ïalehkai kiba heh kiba la thmu ban pyndep mynta u snem.
Ha ka Sngi U Blei, u la ïoh ka jingai khublei na ki paidbah ha Court Philippe Chatrier bad na ka liang u Murray u la thap kti ïa ki.
“Kiba bun na ki nongïalehkai ki la pyni ïa ka mynsiem ha kane ka jaka. Ha kawei pat ka por ka lah ban kylla ha ka jinglah ban ïalehkai,” la pynpaw une u rangïalehkai.
“Ka long ki jingsah kynmaw ïa nga. Kam long kaba suk ïa nga ha kane ka jingïaid lynti ha ka kam ïalehkai. Hynrei nga la lah pyni ïa ka mynsiem iakhun ha kine ki snem kiba la leit.”
Kane ka jingïakhun kaba nyngkong ïa u Murray ha Roland Garros naduh ba u la shah rem ha u Wawrinka ha ka wat kaba nyngkong ha ki saw snem ba la lah bad kan dei kaba ar kaba u la shah rem ha ka semi-final ha utei u rangïalehkai uba na Switzerland ha u 2017.
“Ka met ka jong nga kam long shuh kumba long ha ki shiphew snem mynshuwa bad ïa kane nga tip kham bha. Ka long ka jingïaid lynti kaba jrong na kabynta ban ïashim bynta ha kane ka lympung.”
U Wawrinka, uba la lah ban pynliem haduh lai sien ïa u Murray ha ki saw sien ïakhun ha Paris, u la pynpaw ba u rangïalehkai ka liang pyrshah u long u “lahduh uba phylla.”
