Shillong, Jymmang 27
Ka Southampton ka la wanphai biang sha ka Premier League hadien shi snem ba ka la shah pynhiar kyrdan. Kane ka la wan hadien ba ka la lah ban pynliem noh ïa ka Leeds ha ka ‘ final play-off’ jong ka Championship.
Kane ka nam jop ka la wan urlong lyngba u Adam Armstrong na ka bynta ban pynlong ïa ka Southampton ban rah ïa ka nam jop ha Wembley Stadium.
Kat kum ki riew shemphang kiba la batai la ong ka Southampton ka lah ban kamai haduh £305 million lada ka lah ban pyllait ïalade na ka jingshah pynhiar kyrdan ha ka aïom ka ban wan.
Wat la ka khusnam kan long kaba heh, hynrei ka long ka burom ban ïoh ïalehkai ha ki lympung ba kham heh pyrshah ïa ka Manchester City bad ka Arsenal, ban ïa kaba ïakhun bad ki kynhun kum ka Plymouth bad ka Oxford kiba don ha ka kyrdan second division. Pynban ka jingthrang bad ka jingangnud ka Southampton ban wanphai biang sha ka Premier League ka la urlong shisien namar kane ka la shimpor tang hadien shi snem.
Ka Southampton, kaba la lah ban rah jingjop ha ka FA Cup ha u 1976, ka la pynlut ïa ka por haduh 11 snem ha ka Premier League ha shwa ban kan shah pynhiar kyrdan.
Ha katei ka jingïakhun final ha ka ‘play-off’, ka Southampton ka la lah ban pynliem ïa ka Leeds haduh lai sien wat la ka dangduna haduh lai point ïa katei ka klob kaba na Elland Road.
Nalor ka Southamp-ton, kiwei pat ki kynhun kiba la kiew kyrdan sha ka Premier League ki long ka Leicester City bad ka Ipswich Town.
