Jerusalem, Jymmang:
Kawei na ki longiing jong kito kiba shah rahbor ha ki lehnoh Hamas ka la kynnoh ba dei ka jingbym lah jong u Myntri Rangbahduh ka Israel- u Benjamin Netanyahu ba ki kynthei samla jong ka ri ki shah rah-bor bad shah batbor ruh ha ki lehnoh Hamas naduh kaba sdang.
Namar katkum ka kaiphod ba la ioh lum da ki nongthoh khubor ka Jerusalem, la ong ba ka Ifat Kalderon, kaba dei shi bakha bad ka Ofer, kaba dang shah bat ha ki Hamas haduh mynta hapoh Gaza, ka la pharep pyrshah ia u Myntri Rangbahduh ka Israel bad ong ba dei na ka jingbym shim khia jong u, ba ki samla kynthei jong ka ri ki shah leh-bor ha kitei ki lehnoh Hamas bad ka jingpyneh jong kitei ki lehnoh haduh kine ki sngi ban bat ia kitei kiba ka la rahbor haduh kane ka kynti, ka long namar ka jingbym lah jong u nongialam ka ri ban ñion ia ki nongialam katei ka kynhun lehnoh ba ki dei ban pyllait noh shi syndon ia kitei kiba ka Hamas ka la rahbor sha Gaza baroh.
Ha ka jingiakren bad ki lad pathai khubor, katei ka bahaiing jong katei ka samla kaba shah rahbor sha Gaza, ka la pharep bad ñgiat ka jingkit khlieh sha u Myntri Rangbahduh ka Israel namar ka jingbym lah jong u ban ai ka jingiada kaba biang na ka bynta ki paidbah nongshong shnong jong u.
Shuh shuh ruh ka la ong ba namar ka jingleh jong u Netanyahu, ki khun- ki kti, ki hynmen- para jong ki baroh ki shah bat-bor dusmon ha kitei ki lehnoh ka Palestine bad kumjuh ruh ki khun shynrang bad ki hynmen-para shynrang ki shah shoh- shah tied dusmon bad ki shah pyniap dusmon ha kitei ki lehnoh.
Namar kata, kitei ki paidbah nongïakhih kiba ïeng na bynta ka hok jong kito kiba shah rahbor sha Gaza, ki la kyntu bad dawa ruh ia ka iing Myntri ka Israel ba ki dei ban khang ia ka jingthmu jong u Netanyahu ban iakren ïasuk noh bad ki lehnoh Hamas namar kumba ka Hamas ka leh ia ki paidbah nongshong shnong shnong jong u, ka Israel ruh kam dei ban sngew noh mynsiem ia kum katei ka kynhun lehnoh ka bym don mynsiem sngewlem bad kaba nud ban shim kabu ia ki paidbah ka Israel ha ka por ba khlem poi pyrkhat.
Kumta ruh kitei ki paidbah ki la dawa ia u Myntri Rangbahduh ka ri ba dei ma u ban shim ka jingkit khlieh ban leh eiei na ka bynta ka hok jong ki paidbah jong u bad ban kput ia kitei ki lehnoh ha ka rukom kaba dei bad kumba ki dei hok ban ioh la ka bainong.
Kumba la ai jingkheiñ da ka Israel ha ka kaiphod ba la ioh lum ban peit thuh ia ka jingdon kiba shah ktah bad kiba khlad na ka jingleit hiar thma ki lehnoh Hamas sha Israel ha ka 7 tarik u Risaw 2023, ha kaba ka Israel ka la pyntip ba haduh 1,200 tam ki briew ka Israel ki la duh ei ia ka jingim ha katei ka sngi.
bad palat 250 ngut ruh kiba la shah rah-bor sha Gaza ha ki briew jong ka Hamas, bad bun ngut pat ki la khlad ha ka kti jong ka Hamas, don ruh kiba la shah pyllait bad don ruh kiba dang sahkut ha ka kti jong kitei ki lehnoh haduh kine ki sngi.
Dei namar kane ka daw ba ki paidbah nongshong shnong ka Israel ki bitar bad pynbor ia u Netanyahu ba um dei ban ailad ne sngap ia ka jingkhot ban iakren ïasuk noh bad ka Hamas namar ka jingleh jong ka (Hamas) ka long ka bym lah ban pdiang bad ka bym lah shuh ruh ban map namar wat haduh kane ka sngi ruh kim pat pyllait ia kito kiba ka la rahbor baroh shi katta. Nalor kata, la ong ba ym lah shuh ban tip shai ne ban pyn tikna la kitei kiba ka Hamas ka kam ba ki don ha kti jongka ruh, kin dang im ne ki la khlad hynrei katkum ka jingkam jong ka Hamas la ong ba kitei kiba sha rahbor ki dang don hi bad ka bad ki dang im haduh mynne mynta hynrei ka Hamas ka kwah tang ban ioh ïasuk noh bad ka Israel namar kam kwah shuh ban dang bteng ia ka thma, hynrei dei ka Israel kaba leit ban hiar thma khlem sangeh sha Gaza wat hapdeng ka jingmaham bad jingpynbor jong kiba bun ki tnat ka pyrthei ba ka dei ban sangeh noh ia ka thma hapoh Gaza namar ka la ktah jur palat ia ki paidbah nongshong shnong jong ka nongbah Gaza.
