Shillong, Jymmang 28
Lai ngut ki ‘thei ïalehkai ki la mih noh na ka kynhun ki ‘thei ïalehkai ka Argentina ha ka Lah Sngi U Blei na ka daw ba kim shym la ïoh ïa ka jingsiew ha ryngkat ki kyndon ba pyrkhing ha ka jingkilanmet na ka bynta ban pynkhreh ïa ar tylli ki jingïalehkai paralok.
Kine ki kynthup ïa ka ‘thei apkol ka Laurina Oliveiros, ka ‘thei ïalehkai ‘dien ka Julieta Cruz lem bad ka ‘thei ïalehkai shapdeng ka Lorena Benitez. Kine ki dei ki nongïalehkai kiba ju mihkhmat na kane ka kynhun, hynrei ki la mih noh na kane ka kynhun.
“Kane ka jingmih noh ka jong ngi ka long ba ngi la ngiah halor ka jingleh shilliang khmat halor ka jingbym kheiñdor bad kane ka la nangjur katba nangmih ki sngi,” la pynpaw ka Cruz ha poh ka Instagram ka jong ka. “Ngi donkam ka jingkylla hapoh ka kynhun ki ‘thei ïalehkai phutbol ka Argentina bad ngam shym la kren tang na ka bynta ka jingbei tyngka, hynrei nga kren shaphang ka jingkilanmet, ban ïoh ïa ka bam kaba biang naduh kaba mynstep.”
Ka Cruz bad ka Benitez ki la pynpaw ha ka por ba ki dangdon hapoh ka prokram kilanmet ha kaba ki la ïoh tang da ki jingbam ki bym ïarap ban tei met bad ki bym lah ban ïarap na ka bynta ki nongïalehkai.
Ki la ong ba ka Argentine Football Association ki la pynpaw ha ki ba kin ym ïoh kano kano ka jingsiew na ka bynta kine ki jingïalehkai paralok pyrshah ïa ka Costa Rica ka ban long ha ka Sngi Thohdieng bad ha ka Lah Sngi U Blei namar ïa kine ki jingïalehkai yn pynlong ha la ïing kata ha Buenos Aires.
Na ka liang ka Benitez ka la pynpaw ba kiba haïing jong ka ki la hap ban pynlut haduh 5,000 pesos ($5) na ka bynta ka tiket ban sakhi ïa katei ka jingïalehkai.
“Ki la don da ki million ngut ki ban sakhi ïa kitei ki jingialehkai,” la bynta kane ka ‘thei ïalehkai shapdeng.
Ka Oliveros ka la pynpaw hapoh ka Instagram, “Da ka jingpaid dohnud halor ka jingleh shilliang khmat kan pynlong kaba kynjah suku pa suki.”
