Port Moresby, Jymmang
Ki bor pyniaid ka Papua New Guinea ha ka Sngi Ba-ar ki la pynpaw ka jingsngewkhia kaba jur hadien ba kim lah shuh ban pyntikna la kito kiba ngat bad shah tep im ha ka jingtwa khyndew ha katei ka ri ba kin dang im ne lait im na katei ka jingjia kaba la wan lap ia ka ri ha kine ki khyndiat sngi ba la leit.
Hynrei la ong ba ka jingwad jong ki kynhun iarap ia kitei kiba jah ha kane ka por kam long shuh ban dang ioh pyllait im pynban tang ban shu ioh sei noh ia ka met jong ki kaba la shah tap naduh ba jia ka jingtwa khyndew ha ki sngi ba la leit namar la sngewthuh shai ruh ba kin nym im shuh namar la katta sngi ym pat lah ban ne lap ia ka met jong ki.
Namar la ong ba palat 2,000 ngut ki paidbah nongshong shnong katei ka thaiñ ki la shu thaw lait na katei ka jingjia kaba shyrkhei bad ki la jan duh ia ka jingim jong ki lada ym lah ban pynkynriah noh ha ka por kaba biang.
Kumba 8,000 ngut ruh ki paidbah nongshong shnong na kitei ki shnong kiba don ha katei ka thaiñ ba jia ka jingtwa khyndew, la pynkynriah noh shipor sha ki jaka kiba kham shngaiñ kum shi bynta ban iada ia ki na ki jingma kiba ap ia ka jingim jong ki.
