Shillong, Jymmang 29
Ka India ka la phah ka jingtyrwa na ka bynta ban ïoh pynlong ïa ka World Chess Championship hapdeng u D. Gukesh bad u lahduh u Ding Liren uba na China ha u Naiwieng-Nohprah mynta u snem.
U Gukesh ba dang 17 snem ka rta u la long uba dangkhynnah ban ïaknieh ïa ka nam lahduh ha ka pyrthei da kaba khur jingjop ha kane ka lympung jong u bnai ba la lah. Te kumta un ïakhun pyrshah ïa u Liren hapdeng ka 20 u Naiwieng haduh ka 15 tarik u Nohprah lada ka All India Chess Federation (AICF) ka ïoh ïa ka hok ban pynlong ïa kane ka lympung.
“Ngi la ïohpdiang ïa ka jingtyrwa na ka India,” la pynpaw u CEO ka synjuk ïalehkai jong ka FIDE u Emil Sutovsky.
Haduh mynta, ka FIDE kam shym la ïohpdiang ka jingtyrwa na kiwei ki ri haduh ka 31 tarik mynta u bnai. La sngewthuh ba ka Singapore ka la khmih lynti ban ïakhun bad ka India, hynrei kam pat shym la phah jingthoh eiei halor kane ka bynta.
“Ïa mynta ym pat don ki ri ki ban buh ka jingtyrwa hynrei ka tarik kaba khatduh kan kut mynta ka taïew. Ka jingïalang jong ka FIDE Council kan long ha ka taïew ban wan. Ngin sa shim ïa ka rai shaphang ban ïoh pynlong ïa kane ka lympung,” la bynrap u Sutovsky.
Lada ka AICF ka ïoh ïa ka hok ban pynlong, ka hap ban siew kumba T. 71 klur.
Kat kum ki kyndon ban buh ka jingtyrwa da ka FIDE na ka bynta kane ka lympng ïalehkai jong u snem 2024 kan long T. 8.5 million (kumba T. 71 klur) lem bad ka jingsiew kaba duna kan long USD 1.1 million (T. 9 klur) na ka bynta ka synjuk ïalehkai ka pyrthei.
Kane ka lympung kan neh haduh 25 sngi bad kan kut haduh ka 1 tarik u Naitung.
Ha kaba ïadei bad ka khusnam ba la buh da ka FIDE kan long kumba USD 2.5 million (T. 20 klur tam) hadien ba ka jingpynlut kan kiew na ka USD two million (T. 17 klur) ha u 2023.
Kumba ka paw ka India ka la ïoh ban pynlong ïa kane ka lympung ïalehkai kaba heh ha ka pyrthei ha u snem 2000 ha kaba u Viswanathan Anand u la khur ïa ka nam lahduh da kaba khur jingjop ha kane ka lympung kaba don haduh 100 ngut ki nongïalehkai. U Anand u la lah ban pynliem ïa u Alexei Shirov ha ka final.
