Shillong, Jymmang 29
Ka kynhun ki nongïalehkai martial arts hapoh ka lama jong ka Meghalaya Martial Arts Federation (MMAF) ki la wanrah burom da kaba khur bun tylli ki takma ha ka lympung ïalehkai 8th National Kung Fu Championship ba la pynlong da ka Kung Fu Sport Association of Assam.
Ka MMAF ha kane lympung ka la phah haduh 23 ngut ki nongïalehkai bad khur 9 tylli ki takma ksiar, 2 tylli ki takma rupa bad 8 tylli ki takma rnong.
Haba pynpaw ha ki lad pathai khubor, u coach ka MMAF bad uba long ruh u President katei ka synjuk u Bah Thomas Rongthaluh u la pynpaw ba mynta u snem ka synjuk ka la lah ban sei ïa ki nongïalehkai kiba kynsai kiba la lah ban wanrah burom ïa ka Jylla ha kane ka lympung ïalehkai hapoh ka Jylla bad mynta ka la khmih lynti ban ïalehkai bha ha ki lympung ïalehkai ki ban long shabar ri.
U la pynpaw ka jingsnewkmen halor ka jingshah jied ki nongïaleh-kai ki ban mihkhmat dangshen ha ka National Kung Fu Championship ha kaba ki la lah ban pynpaw ïa ka jingtbit na ka bynta ban khur takma bad u la khmih lynti ba kin danglah ban khur bun tylli ki takma ha ki lympung ïalehkai ki ban dangwan nangne shakhmat.
