Shillong, Jymmang 30
Ka jingïalum lang kaba khyndai jong ka North East Cricket Development Committee (NECDC) kaba la pynlong da ka jingïasoh lang jong hynriew tylli ki jylla ka thaiñ shatei lammihngi kum ka Arunachal Pradesh, Manipur, Meghalaya, Mizoram, Nagaland bad ka Sikkim kan long ha ka janmiet jong ka sngi Saitjaiñ ha State Convention Centre, Shillong.
Ïa kane ka jingïalang yn pynlong da ka Meghalaya Cricket Association ka ban sakhi ruh ïa ki jingsam khusnam 3rd Achievers’ Awards Night sha ki nongïalehkai kriket kiba ïalehkai bha bad ki nongmihkhmat jong ki hynriew tylli ki jylla na ka bynta ki lympung ïalehkai jong ka BCCI 2023-24.
Ïa kane ka jingïalang la ju pynlong man la u snem ha kylleng ki jylla jong ka thaiñ shatei lammihngi bad ka MCA ka la ïoh teng ban pynlong ha snem 2018. Ha kane ka jingïalang yn ïadon lang ruh ki dkhot jong baroh ki synjuk ïalehkai ka Jylla, ki nongseng bad ki nongïalehkai ki ban sa ïohpdiang ïa ki khusnam jong ki.
Ïa ka NECDC la seng ha u snem 2016 ha kaba la ïadon lang ki nongseng naduh u Convenor bad u Co-Convenor. Ka jingthmu jong kane ka long ban ïoh ïa ka jinglong dkhot ba pura ha ka BCCI na ka bynta ban ïoh ïa ka hok ban ïashim bynta ha ka Ranji Trophy lem bad kiwei ki lympung ïalehkai jong ka BCCI.
Ka nongrim jong kane ka NECDC ka long ban kyntiew ïa ki jingïalehkai kriket bad ruh ban pynthikna ïa ka jinglong dkhot ba pura bad ka BCCI khnang ban kyntiew ïa kane ka jingïalehkai naduh ki khynnah kiba dangrit.
Shuh shuh ka jingthmu jong kane ka synjuk ka long ban kyntiew ka jingïalehkai kriket ha ka thaiñ shatei lammihngi bad ruh ban bud ïa ki kyndon kiba long kat kum ki jingbthah jong ka BCCI.
Ka NECDC ka long ruh shi bynta ban wanrah ka jingïatylli lang kawei kum ka kynhun. Ka NECDC Inter State Friendship Cup ka la sdang ha u 2023 bad ka jingithuh ïa ki nongioh khusnam ha baroh ki lympung ïalehkai jong ka BCCI – Men, Women, Boys bad Girls naduh u 2022.
