Shillong, Jymmang 30
Ka Paris Saint-Germain kam shym la siew dep ïa ka tulop jong u Kylian Mbappe lem bad kiwei ki jingsiew kiba la ïateh kyndon hapdeng ka klob bad utei rangïalehkai wat la u la pynkhreh ban mih na kane ka lahduh kaba na France.
Kat kum ki khubor la ong ba ka rai jong ka PSG ka long ban pynsahteng ïa ka tulop jong u Mbappe kaba ïadei bad ka jingïamynjur lang baroh arliang mamla mynshem snem shwa ban sdang ka aïom ïalehkai.
Hynrei ki khubor ki ïathuh ba ka jingïakren hapdeng ka klob bad utei u kapten ka France ka la poi sha ka jingïasngewthuh jingmut lang ha kaba kut.
“La lah ban pynbeit ïa baroh kine kynrum kynram,” la pynpaw ki khubor khlem da pynthikna ïa ka jingsiew kaba dei hok ban ïoh da u Mbappe.
Hynrei ha kawei pat ka liang la ong ba ka PSG ka la rai ban ym siew ïa ka ‘bonus’ jong u Mbappe, kane ka mut ba kane ka jingsien ka lah ban kot shaduh 80 million euros ($86.8m).
Kane kajuh ka khubor ka la pynpaw ba katei ka klob ka la rai ban ym siew ïa ka tulop jong u khlem da maham pyrshah ïa u Mbappe bad khlem ka jingïamynjur lang ha baroh arliang mamla.
Kumba ka paw ka kontrak jong u Mbappe ka la kut ha ka 30 tarik u Jylliew bad u la pynthikna ban mih noh na ka PSG hadien hynñiew snem bad ka Real Madrid ka la khmih lynti ban wanrah ïa utei u kapten ka France.
