Shillong, Jymmang 30
Ka Bayern Munich ka la thung ïa u Vincent Kompany kum u coach bathymmai na ka bynta lai snem hadien ba une u rangïalehkai barim na Belgium u la ïakhlad lok noh bad ka Burnley, kaba la shah pynhiar kyrdan noh na ka Premier League.
Ïa kane la pynbna da baroh ar tylli ki klob ha ka Sngi Balang bad kane ka kontrak kaba thymmai jong u kan kut haduh u Jylliew 2027.
“Ngi sngewthuh ïa ka jingkyrpad jong ka klob kum ka Bayern Munich bad ngi burom ïa ka jingthrang bad jing-angnud u Vincent ba un nang lah ban pyni ïa ka sap ka jong u kum u coach,” la pynpaw kat kum ka kyrwoh ba la pyllait da ka Burnley.
Na ka liang u CEO ka Bayern u Jan-Christian Dreesen u la ong, “Ngi baroh kum ka klob ngi la mynjur ïa u Vincent Kompany kum u coach ba pura ban shimti ïa ka FC Bayern bad ngi khmih lynti ban ïatrei lang bad u.”
Ka Bayern, kaba la bat ïa ka nam lahduh haduh 11 sien ha ka Bundesliga, ka la wan ha ka kyrdan balai hadien ka Bayer Leverkusen bad ka VfB Stuttgart ha kane ka aïom.
Ka long ka sien kaba nyngkong eh ha ki shiphew snem ïa kane ka kynhun kam shym la lah ban pynpaw ïa ka jingtbit ha ki lympung ïalehkai hapoh katei ka ri lane ha Europe, ha kaba ka la pynlong ïa u Thomas Tuchel ban mih noh na kane ka klob, ïa kaba la pynbna naduh u Rymphang mynta u snem.
Kane ka jingwan ïasoh u Kompany ka la pynkut noh ïa ka jingwad coach la slem na ka bynta ban mih bujli ha ka jaka u Tuchel, wat la ki la don bun ngut ki coach kiba la kwah ban shimti ïa kane ka klob.
Kiwei ki coach kiba la kwah ban shimti ïa ka Bayern ki kynthup ïa u coach ka Leverkusen u Xabi Alonso, kumjuh u coach barim u Julian Nagelsmann bad u Ralf Rangnick na Austria bad hadien la lah ban thung ïa u Kompany.
“Nga la khmih lynti ban wan sha ka Bayern bad ka long ka burom kaba khraw ban ïatrei lang bad ka klob. Ka Bayern ka long kum ka shlem na ka jingïalehkai phutbol,” la ong u Kompany.
Kumba ka paw u Kompany, uba la ïalehkai haduh 360 sien ha baroh ki lympung ïalehkai na ka bynta ka Manchester City bad u la ïadon bynta ban khur ïa ka nam lahduh haduh saw sien ha ka Premier League.
U la sdang ban shimti kum u coach na ka bynta ka klob na Belgium ka Anderlecht bad u la pynlut ïa ka por haduh ar tylli ki aïom hashwa ba un ïasoh sha ka Burnley ha u 2022.
Hynrei ka Burnley ka la shah pynhiar kyrdan noh na ka Premier League hadien ba ka la wan ha ka kyrdan ba 19 bad kamai 24 point bad ka la jop tang san sien.
