Shillong, Jymmang 30
Ka Bengaluru FC ka la pynkhreh ban pynkhlaiñ ïa ka kynhun na ka bynta ka lympung ïalehkai ban wan da kaba ka la wanrah da u Mohamed Salah K na ka bynta ka kontrak kaba jrong.
Une u rangïalehkai ‘dien uba dang 29 snem ka rta u dei uba la ïadon bynta bad ka Punjab FC, kaba la wan ha ka kyrdan baphra ha ka lympung ïalehkai Indian Super League.
Une u rangïalehkai ‘dien na Kerala u la ïoh ïalehkai 13 sien ha ka Indian Super League (ISL) jong ka aïom ba la lah bad u long u rangïalehkai ba kynsai.
Kumba ka paw ka Bengaluru FC ka la ïakynduh jingeh ha ka aïom ba la lah na ka daw ka jingtlot ha ka bynta kaba shadien bad mynta ka la ithuh ïa ka jinglah u Mohamed Salah ban pynkhlaiñ ha katei ka bynta.
Ki bor pynïaid kane ka klob ki la pynpaw ba u Salah un ïatrei lang ryngkat u Roshan Singh Naorem ha ka bynta kaba shadien. Ki khubor ki ïathuh ba ka Bengaluru FC ka la rai ban die noh ïa u Jessel Carneiro bad ka la bun ka jingtyrwa ha ka dor kaba biang.
Ha kawei pat ka liang ka Punjab FC ka la buh ka jingtyrwa ïa u Mohamed Salah na ka bynta ban bteng biang ïa ka kontrak, hynrei utei u rangïalehkai u la jied ban pynïasoh ïalade sha ka Bengaluru FC. “Ka Punjab ka la tyrwa ban bteng biang ïa ka kontrak ka jong u hadien ba u la lah ban pynpaw ia ka jingtbit ha ka aïom ba la lah, hynrei ka Bengaluru ka la lah ban pynkohnguh na ka bynta ban soi ïa u,” la ong ki khubor.
Ka Bengaluru FC ka la dep soi ruh ïa u Rahul Bheke ryngkat u Jorge Pererya Diaz bad u Alberto Noguera ha kane ka aïom lyiur. Kane ka klob ka dangïaleh ban nangïai pynkhlaiñ naduh ka aïom ba la lah.
Kham hashwa kane ka klob na Bengaluru ka la pynjlan ïa ka kontrak bad u Ryan Williams na ka bynta ar snem bad kumjuh ïa u rangïalehkai ‘dien u Aleksandar Jovanovic. Kane ka klob ka la soi ruh ïa u rangapkol u Lalthuammawia na ka Odisha FC.
