Jowai, Jymmang 31
Shi bynta ka jingpynkhreh ïa ka lympung ïalehkai baheh ka Jylla ka 6th Meghalaya Games ka ban long ha nongbah Jowai ha u Kyllalyngkot jong u snem ban wan, ka kynhun napoh ka Meghalaya State Olympic Association (MSOA) ha ka sngi Thohdieng ka la hiar sha nongbah Jowai ban jurip ïa ka jinglong jingman jong ki jaka na ka bynta kane ka lympung.
Ha kane ka jinghiar jurip la ïalam da u Presi-dent Bah John F. Kharshiing bad General Secretary Bah F.L. Pariat kumjuh u Project Engineer State Sports Council Meghalaya Bah P. Pale ha ka jingdonlang u District Sports Officer Bah K Passah, ki nongïalam ka WJDSA kynthup Bah Patrick Lamare, Bah Nangebormi Suting, nalor kiwei kiwei.
Kane ka kynhun ka la leit ban jurip ïa kiba bun ki jaka kynthup naduh ka Kiang Nangbah Stadium, Don Bosco Secondary School, Mihmyntdu, Bosco Pnar Salini Colony, Kiang Nangbah Government College, Amphitheatre kaba don ha Moolasyat, Jowai Polytechnic College, Kadar Daloi Law College, Tome Memorial Higher Secondary School, Mooralong, Chutwakhu Indoor Stadium, Jowai Public School, Khimmusniang Indoor stadium, madan Jrisalein.
Nalor kata la leit jurip ruh ïa ka Chilliang Raij Community Hall, Dulong Indoor Hall, Tpeppale Community Hall, Sein Raij Indoor Hall, Lion Sports Club Hall, Jowai Presbyterian LP School, Govt UP School Chutwakhu, Govt Girls bad Govt. Boys HS. School, Kiang Nangbah Hr Secondary, St. Mary Mazzaerello Higher Secondary, Marian Hills Hr Sec School, Ladthadlaboh Indoor Hall bad MDC Hostel.
U President ka MSOA Bah John. F. Kharshiing haba kren sha ki lad pathai khubor ula ong, ka jingwan jong ki mynta ka sngi ka long tang ka sien nyngkong na ka bynta ban pynkhreh ïa kane ka lympung. “Ngi sngewkmen ba ki synjuk ïalehkai napoh ka jylla ngi ïoh ïa ka lad lyngba ka jingkyrshan ka sorkar ban pynlong ïa kane ka lympung ïalehkai kaba heh ka Jylla manla u snem.
U la ong ka jingwan jong kane ka lympung MG 2025 kan long ka kabu ksiar ïa ki samla jong kane ka thaiñ ba kin ïashim bynta bad ban sei ïa ki sap ïalehkai.
