Shillong, Jymmang 31
U khlur ïalehkai phutbol ka Uruguay u Edinson Cavani u la pynbna ban shongthait noh na ka jingïalehkai bar ri ha ka rta 37 snem. Kane kan dei ruh ka jingkut noh shi syndon ba un mihkhmat ïa ka ri lajong.
Une u rangïalehkai u la lah ban pynsah kynmaw na ka bynta ka kynhun ïalehkai ka Uruguay da kaba u la long u ba ar napdeng ki rangthep kol ba kynsai bad u balai napdeng ki rangïalehkai ba kham slem.
Ha kane ka jingïaid lynta ha ka kam ïalehkai na ka bynta ka Uruguay, u Cavani ula lah ban pynpaw ïa ka jingtbit da kaba u la lah ban thep 58 kol ha ki 136 tylli ki jingïalehkai.
U la noh synñiang na ka bynta ka ri jong u da kaba u la ïoh ban ïashim bynta saw sien ha ka FIFA World Cup (2010, 2014, 2018, 2022) bad ka jingsdang kaba nyngkong eh ka dei ha u snem 2010 bad la ithuh ïa ka jingtbit jong u ha ka kam ïalehkai.
U Cavani u la ïadon bynta na ka bynta ka kynhun ïalehkai ka Uruguay da kaba khur jingjop ha ka Copa America 2011 ha Argentina, bad kane ka la sakhi ïa ka jingtbit na ka bynta ka kynhun.
Ha kane ka jingpynbna ka jong u ha ka rynsan social media halor ka jingshongthait, u Cavani u la pynpaw ka jingai khublei na ka bynta ka ri jong kaba la plie lad ïa u ban mihkhmat ha kiba bun ki lympung. “Ka long ka jingkyrkhu ïa nga ba nga la ïoh ban phong ïa ka jersey bad ban mihkhmat ïa kaba nga da ïeit eh ha ka pyrthei, ka ri jong nga.”
“Mynta ka sngi nga la rai ban shongthait noh, hynrei ngan ïai long borabor ha ka mynsiem ka jong nga na ka bynta ka ri kumba nga la ïoh ban ïalehkai ha ki por ba la leit.”
U Cavani u la ïoh ban ïalehkai na ki katto katne tylli ki klob ha Europe kum ka Napoli, Paris Saint-Germain bad ka Manchester United. Ïa mynta u la leit ban ïalehkai na ka bynta ka kynhun ba paw ha Argentina, ka Boca Juniors.
