Jakarta, Jylliew:
Sa shisien pat la ong ba u Lum mihding ‘Mount Ibu’ jong ka ri Indonesia u la bthei biang ha ka Sngi Ba-ar bad kynshait ia ki dpei napoh jong u shaduh 5 Kilometres lane kumba 3 miles shalor suiñ, la iathuh ka tnat ba dei khmih ia ki Lum mihding kiba don ha katei ka ri. Hynrei la ong ba ia mynta hi, ki bor pyniaid kim pat shym la pynkhreh ne pynkynriah noh ia ki nongshong shnong na katei ka thaiñ.
La ong ba utei u lum u don sha ka phang Mihngi jong ka dewlynnong Halmahera bad u la bthei ha ka por kumba 5:36 mynstep, bad ka tnat PVMB ka la khang noh ia ki kam- ki jam ha katei ka thaiñ kumba 7 Kilometres lane kumba 4.4 Miles na katei ka jaka ba utei u lum mihding u don.
La ong ba utei u lum u la sdang ban treikam biang ha kane ka por namar ka jingkhluit bad jingkylla ka suiñ bneng bad kumjuh ruh ka jinglong-jingman bad ka rukom khih phaloh jong ki um ding shapoh ka khyndew kaba utei u lum u ïeng.
La ong ba ka tnat PVMB ka la pyntip ba utei u lum u la sdang ruh ban kynshait ding khyndiat ha ka Sngi Nyngkong.
Kumta, la ong ba katei ka jingbthei jong utei u lum mihding ha katei ka Sngi Ba-ar, ka la pynlong ia ki bor pyniaid ka Indonesia ba kin pynkynriah noh ia ki nongshong shnong jong hynñiew tylli ki shnong kiba don hajan katei ka thaiñ ba don utei u lum mihding.
Namar la ong ruh ba ka ri Indonesia ka don ha ka bynta jong ka pyrthei kaba la khot ka ‘Pacific Ring of Fire’, kaba long ka thaiñ kaba ju jur bha ki jingpynthut jong ki bor ka mariang kynthup ia u jumai bad ka jingbthei ki lum mihding.
Namar la ong ruh ba ka jingbthei jong u Lum mihding Ruang sha ka phang Shatei jong ka Sulawesi, ka la pynlong ia ki bor pyniaid ka Sulawesi ba kin pynkynriah noh ia palat 12,000 ngut ki paid nongshong shnong na katei bynta khnang ban pyllait ia ki shipor na ki jingma kiba lah ban ktah lada utei u lum un bthei bad mihding biang ha ki sngi ban wan.
Kumjuh ruh la ong ba ki la don kumba 60 ngut kiba la khlad na ki jingjia shlei um bad ka jingtuid katei ka dpei ding kaba mih na utei u Lum mihding Mount Marapi, uba long u Lum mihding uba kham treikam bha na kiwei pat ki lum mihding kiba don ha West Sumatra.
