Shillong, Jylliew 05
Kawei na ki nongñiah kali ba paw ka Jylla ka samla Phoebe Dale Nongrum ka la wan ha ka kyrdan ba-ar ha ka jingïakop pynher kali jong ka wat ba ar jong ka Rally Championship ba la pynlong da ka Blue Band Sports naduh 31 tarik u Jymmang haduh 2 tarik mynta u bnai ha Maharashtra.
Ka Phoebe ka la khur ïa ka jingjop ha ka wat kaba nyngkong jong ka South Indian Rally ha Chennai, ha kaba ka la wan ha ka kyrdan ba hakhlieh jong kane ka jingïakop. Hadien ka wat kaba ar, ka bteng ban tam ha kane ka jingïakop na ka bynta ka Meghalaya bad kumjuh ïa ka thaiñ sahtei lammihngi.
Wat la ka la khur jingjop ar sien ha ki jingïakop kiba la long ha ki ar tylli ki nongbah jong ka ri, ka Phoebe ka dangsah sa saw sien na ka bynta ban jingjop biang ha ki jingïakop jong ka INRC.
Ha kane ka jingïakop pynher kali ki don haduh 10 tylli ki wat, ha kaba manla kawei pa kawei ki long kiba ïapher ha ka jingjngai, kynthup ïa ka Alpha, Beta bad ka Gamma. Ka Beta stage ka ong 22-kilometer, kaba kynthup ïa ki jaka ba kham eh, kiba long khohruh khohram bad kiba long lum. Ha kane ka kyrdan ïakop ki don bun ki nongïashim bynta ha kaba ki la ïakynduh jingeh. Kiwei ki jingïakop ki long kiba kham eh shuh shuh.
Napdeng ki 53 ngtu ki nongïashim bynta ha ka INRC ha Maharashtra, ka samla Phoebe ka la wan ha ka kyrdan ba-ar ha ka kyrdan ïakop jong ki kynthei, ba phra ha ka INRC 3 category bad ka la wan ba 15 na baroh ki nongïashim bynta.
Na ka liang ka Phoebe ka la khmih lynti ban khur ïa ka nam lahduh ha ka Indian National Rally Championship mynta u snem hadien ba kan pyndep ia ki hynriew tylli ki wat jingïakop. “Wat la dangsah sa saw tylli ki wat jingïakop, ngi kyrmen ba lyngba ka jingïakyrshan lang kan sa lah ban kynjoh sha ka thong,” la pynpaw kat kum ka kyrwoh ba la pyllait da ka Kong Easter Giselle Kharkongor, ka President ka Meghalaya Motorsports Society.
