Jersusalem, Jylliew:
Ka Israel ha kane ka kynti ka la pynpaw ka jingsngewkhia kaba jur namar shi bynta na ka lai bynta jong kito kiba shah rahbor sha Gaza ki la dep khlad lypa. Kumta ka Israel ka la pynpaw ba ka jingiakren ïasuk bad ka Hamas ka long ka bym sngew don jingmut shuh lada bun na kitei kiba shah rahbor ki la khlad lut ha ka kti jong ki lehnoh Hamas. Namar kata, dei na kane ka daw kaba la pynlong ia ka Israel ba kan iaid shakhmat ia ka jingleit hiar thma sha Gaza wat haba kiwei ki ri ki dang ialeh ban pyniakren bad ban wanrah ia ka jingiasuk hapdeng ka Hamas bad ka Israel ha kine ki sngi.
Namar la ong ba napdeng ki 250 ngut eiei kiba shah rahbor sha Gaza Strip ha ki briew ka kynhun lehnoh Hamas naduh ka 7 tarik u Risaw 2023 ba ki leit thombor bad leit hiar thma sha ki bynta khappud Shatei jong ka Israel, bun na kitei kiba shah rahbor ki la khlad katba ki dang don ha ka kti jong ki lehnoh Hamas. La ong ruh ba ka Israel kam lah shuh ban pyntikna la kito kiba ka Hamas ka kam ba ki dang don hapoh kti jong ka ruh hato kin dang im ne kim im shuh ruh namar katkum ka jingshem jong ki shipai ka Israel, katba ki dang leit khynra bad leit hiar thma sha ki kyndong-kynshrot bad ki bynta bapher jong ka nongbah Gaza, ki nang lap shuh shuh ba kito kiba shah rahbor bad kiba don bad ki lehnoh Hamas ki la khlad bad la shu lap sa tang ia ka metiap jong ki.
Katkum ka jingkheiñ ba la ioh lum da ka sorkar Israel, la ong ba ki don sha 120 ngut ba ka Hamas ka dang bat sah haduh kine ki sngi, ha kaba 43 ngut pat ki dei kiba la nang lap man ka sngi bad kiba la lap sa tang ia ka met hynrei ki bym dei shuh kiba dang im.
