Shillong, Jylliew 10
Ka Indian Olympic Association kan bteng ban ai jingkyrshan pura ïa ki hynriew ngut ki nongïalympat hadien ba ka Olympic committee bad ka WFI ki la pdiang ïa ka jingkyrpad ka Vinesh Phogat na ka bynta ki lad jingïarap ha ki jingkilanmet.
Kine ki hynriew ngut ki long ka Vinesh Phogat (50kg), Antim Panghal (53kg), Anshu Malik (57-kg), Nisha Dahiya (68kg) bad ka Reetika Hooda (76kg) ha ka liang ki kynthei bad u Aman Seh-rawat (57kg) ha ka liang ki shynrang, kiba la ïoh rung sha ka Paris Olympic.
Ka president ka IOA ka P.T Usha ha ka kyrwoh ba la pyllait ha ka lah sngi U Blei ka la khmih lynti ban pynbiang ïa baroh ki jingdonkam khnang ba ki nongïalehkai kin lah ban ïalehkai bha.
“Da kaba ïaleh ban ai jingkyrshan ïa ka kynhun, ngi khmih lynti ban pynlong ïa ki nongïalympat ba kin lah ban ïalehkai bha. Kane ka rai ka la wan lyngba ka jingshim khia ka jong ngi na ka bynta ka jingbit jingbiang jong ki nongïalehkai,” la ong ka Usha.
Ka IOA bad ka WFI ki la thmu ban ai jingkyrshan ïa kitei ki nongiakura kynthup lang ïa ki coach, ki physiotherapy, nutritionists, ki mental-conditioning coach, bad kiwei ki jingdonkam hashwa ban kin leit ïashim bynta sha ka Olympics.
U President ka Wrestling Federation of India u Sanjay Singh u la ong ban pynbiang kham bun ki nongïarap na ka bynta ka jingkilanmet jong ka Vinesh kaba la khur ïa ka takma ksiar ha ka Asian Games.
“Ngin pynthikna ba ka Vinesh lem bad baroh ki nongïalympat ki jong ngi kin ïoh ïa baroh ki jingdonkam khnang ba kin lah ban pynurlong ïa ka nam jop na ka bynta ka ri,” u la bynrap.
“Kane ka jingshim khia ka dei lyngba ka jingïatrei lang hapdeng ka IOA bad ka WFI na ka bynta ban kyntiew ha ka jingkilanmet, ka jingpynkhreh bad ha baroh ki jingkyrshan ïa baroh ki nongïalehkai jong ka ri. Ka thong hi ka long ban plie lad ïa ki nongïalehkai jong ka ri ba kin pynpaw ia ki sap ïalehkai jong ki ha ka pyrthei hi baroh kawei,” la ong ka kyrwoh na ka IOA.
