Shillong, Jylliew 11
Ki don haduh 292 ngut ki rangïalehkai ka Jylla kiba la pyndep kyntiap klob ha ka Inter Transfer Club kaba la poi sha kaba kut ha ka Sngi Saitjaiñ jong ka taïew ba la dep hadien ba ki la lah ban pyndep ïa ka jingsoi ha ka miej jong ka Shillong Sports Association.
Katkum ka jingpynpaw na u General Secretary ka SSA u Bah Dipshon L. Nongbri, u la ong ba ka long kaba sngewtynnat bha kane ka jingïakyntiap klob kaba mynta, namar ki don bun kiba la pyndep ïa ka jingsoi soskular na ka bynta ban pynïasoh noh sha kiwei pat ki klob kiba ïashim bynta naduh ka Shillong Premier League, First, Second, Third bad ka Fourth Division.
“Ngi sngewkmen ba wat ki klob thymmai ruh kiba na ka 4th Division ki la sei ïa ki rangïalehkai. Kane ka pynpaw ïa ka jingdon mynsiem jong ki ban ïalehkai ha ka Shillong League naduh ka 1st haduh ka 4th Division,” u la bynrap.
Na ka liang kane ka synjuk shen kan sdang noh ïa ka lympung ïalehkai Fourth Division. “Ngin sdang noh ïa ka 4th Division ha ka taïew balai jong mynta u bnai. Ngi kham slem khyndiat, ka long ba ngin ailad ïa kine ki kynhun kiba ïoh ïa ki rangïalehkai bathymmai ba kin ïoh ban pynkhreh bha ïa ki kynhun jong ki.”
Shuh shuh u la ïathuh ba kane ka jingkyntiap klob kaba don haduh 292 ngut ki rangïalehkai ka dei beit tang ha kane ka Shillong League, hynrei ym shym la kynthup ïa ka Inter District bad Inter State Transfer.
Na ka bynta ban pyntyllun ïa baroh ki lympung ïalehkai, u Bah Nongbri u la pynpaw ka jingsngewkmen ruh ba ka synjuk ka la ïoh ïa ka jingïatrei lang ruh bad ka synjuk, ki rephri khnang ba baroh ki lympung ïalehkai kin long kiba ïaid beit ïaid ryntih.
