Shillong, Jylliew 14
Ka Meghalaya kan lah ban ïatrei lang bad ka France ha ki kam ïalehkai hadien ba la pynlong ka jingïalang ha ka Sngi Thohdieng ha Kolkata ha ka shlem treikam u Consulate jong ka ri France.
Ha kane ka jingïalang la ïadon lang u Consul General ka France u Didier Talpain, ha ryngkat u Samuel Bouchard, Charge de mission/ Cooperation officer, Bah John F. Kharshiing, Working President a Meghalalaya State Olympic Association (MSOA), kumjuh u Vice President ka National Rifle Association of India (NRAI), u Secretary General ka North East Sports Association (NESA).
Kane ka jingïalang ka long kum ka jingbuddien ïa ka jingïalang kaba la long ha ka 10 tarik u Jymmang ha Shillong hapdeng u Thierry Mathou, Ambassador ka France ha ka jingïadon lang u Consul General u Didier Talpain, u Chief Secretary Bah D.P Wahlang, Dr. Vijay Kumar D (IAS), Commis-sioner ka tnat Planning, Agriculture, Sports bad kiwei. bad u Working President MSOA, kiba la ïakren halor kiba bun ki tnat treikam kynthup ki kam ïalehkai.
Ha kane ka jingïalang mynta ka sngi la ïatai halor kumno ban pynjanai ïa ki jingïakren ban ïoh ka jingïatrei lang kaba jan hapdeng ki kynhun ïalehkai na Ri France, bad ban thaw ki lad ban ïakylliang (exchange program) hapdeng Meghalaya bad Ri France ban ïasyllok, ïatreilang kumno ban kyntiew ïa ka jingïalehkai khamtam ka Jylla kan hap ban pynlong ïa ka National Games ha u 2026 lane 2027.
