Beirut, Jylliew:
Ka kynhun lehnoh Hezbollah jong ka Lebanon, ha ka Sngi Balang ka la pyntip ba uwei na ki heh nongialam katei ka kynhun hapoh Lebanon u la khlad noh ha ka jingleit thombor jong ki liengsuiñ ka Israel ha ka Sngi Ba-ar.
Katei ka kynhun lehnoh ka la pyntip ba utei u heh nongialam uba la khlad noh ha katei ka jingjia u dei ba la ju tip kum u Sami Abadallah alias Abu Taleb bad uba la kha ha u snem 1969.
Kumta katei ka kynhun lehnoh ka la pynpaw ia ka jingsngewsih kaba khraw halor ka jingduh noh ia utei u heh nong-ialam uba la lamkhmat bad shakri ia ka kynhun ha ki kam baroh shi katta.
La ong ba katei ka la jia ha ka shnong Jouaiyya, kumba 15 Kilometres lane 9 Miles na khappud bad ka Israel, ha kaba 3 ngut kiwei ruh ki la ngat bad khlad lang ha katei ka jingjia.
Namar la ong ba ka la don ka jingiakynad hapdeng kitei ki arliang mamla naduh kine ki sngi ba la leit bad kane ka la jia naduh ba ka Israel hi ka la leit ban kput ia ki lehnoh Hamas halor ka jingleit thombor ia ka Israel ha ka 7 tarik u Risaw jong u snem ba la dep.
Ka jingiakynad khappud hapdeng ka Israel bad ka Lebanon ka la shim ia kumba 458 ngut ki mynsiem briew na Lebanon bad da ki phew hajar ngut ki la sakma bad phetwir namar ka jingsheptieng ia ka jingiakynad hapdeng ka Hezbollah bad ka Israel ha kane ka por.
