Shillong, Jylliew 14
Ka Little Star HSS, Jakrem Presbyterian HSS bad ka Tenset SS ki la long ki lahduh ha ka lympung ïalehkai South West Khasi Hills District Level Inter-School Subroto Cup Football Tournament 2024 ba la pynïaid da ka shlem treikam jong u District Sports Officer (DSO) jong kane ka District.
Ha ka jingïakhun final jong ka kyrdan ïalehkai Under-15 (Boys), ka Little Star ka la pynliem noh ïa ka Rangthong Christian HSS lyngba ka tie-breaker, kumjuh ha ka Under-17 (Girls), ka Jakrem Presbyterian ka la jop ïa ka Rangthong Christian HSS lyngba ka tie-breaker, katba ha ka Under-17 (Boys), ka Tenset ka la pynliem noh ïa ka Mawjarain Presbyterian lyngba ka tie-breaker.
Ha kane ka lympung kaba la sdang naduh 4 tarik mynta u bnai la pynlong ha madan MDSA, Pyndeniewlyngdoh bad ha Rowell Lyngdoh Stadium, ha kaba la wan ïashim bynta da 36 tylli ki kynhun. Ha ka U-15 ki don 27 tylli ki kynhun, ha ka U-17 (Boys) ki don 18 tylli bad ha ka U-17 (Girls) ki don 16 tylli.
Ha katei ka sngi pynhap pyrda la ïadon lang u Bah D. Mawleiñ (D.S.P.), u Bah D. Syngkon (District Sports Officer), Bah P. Wanñiang (General Secretary ka MDSA), Bah S. K. Budnah (President ka Mawlangwir SC), Bah K. Kharlyngdoh (President ka Nonglang SC), lem bad u khlur ïalehkai katei ka thaiñ u Chestarpaul Lyngdoh bad kiwei.
Lyngba kine ki nam jop ka Little Star, Jakrem Presbyterian bad ka Tenset kin mihkhmat ïa kane ka district sha ka State Level Inter School Subroto Cup Football Tournament 2024 ka ban sa long shen ha kane ka nongbah Shillong.
