Jowai, Jylliew 14
Ka North Liberty HS School, Laishnong HS School, St. Dominic HS School, Sawlyngdoh HS School, Mowkaiaw bad ka Kiang Nangbah Govt. HS School ki la buh jaka ïalade sha ka quarter final jong ka Under-17 (Boys) hadien ba ki jop ha ki jingïakhun pre-quarter final kaba la long ha madan Kiang Nangbah Stadium, Ladthadlaboh Jowai ha ka Sngi Thohdieng.
Ïa kane ka lympung ïalehkai District Level Inter School Subroto Mukherjee Cup Football Tournament 2024 la pynïaid da ka shlem treikam u District Sports Officer (DSO), West Jaiñtia Hills District.
Haba phai sha ka jingïakhun pre-quarter final ka North Liberty HS School ka la pynliem noh ïa ka Mihmyn -tdu Secondary School da 1-0 kol. Ka Laishnong HS School ka la jop ïa ka On and On English Secondary School lyngba ka tie-breaker da 4-3 kol.
Ka St. Dominic HS School ka la pynliem ïa ka Seinraij HS School da 3-0 kol. Ka Sawlyngdoh HS School Mowkaiaw ka la pynliem ïa ka Mihmyntdu RC Eve Secondary School da 2-0 kol. Katba ka Kiang Nangbah Govt. HS School ka la pynliem ïa ka Ummulong Persbyterian HS School da 3-2 kol lyngba ka tie-breaker.
Ka jingïakhun pre-quarter final ha ka sngi Saitjaiñ jong ka kyrdan Under-17 (Boys) kan long hapdeng ka HK. Singh Memorial SS pyrshah ïa ka St. Claret SS. Ka Kymprup SS pyrshah ïa ka Lumpyrtuh SS bad ka Govt. Boys HSS pyrshah ïa ka Nongbareh Lyntiar SS.
Katba ha ka kyrdan ïalehkai Under-15 (Boys) kan long hapdeng ka HK Singh Memorial SS pyrshah ïa ka Jaiñtia HS School. Ka Jowai Presbyterian UP School ïa ka Sabahmuswang UPS.
