Ha ka jingïohi jongnga kum uwei na ki ‘riew paidbah ba la palat ïa ka 70 snem ka rta nga kwah ban pynpaw hangne kaba ïadei bad ka rukom ai jingkyrshan jongngi ïa uno uno u kyrtong la ka dei ka elekshon MLA/MP ka Jylla. Haba phai katkum ka jingmih khubor la ïohi ba u President ka VPP u kwah ba ka sorakr MDA kan aiti noh ïa ka bor synshar kaba la ïoh jingjop jong ka seng NPP bad UDP lyngba ki nongmih khmat (MLA) ha ka elekshon ba la dep kaba la pynjop bun ïa ka seng NPP bad ka UDP ban ïoh thaw ïa ka sorkar MDA.
Une u President u pan ïa ka bym lah long tangba jop M. P. Ka mut u pynkheiñ ïa ka riti synshar ka ri ban pan aiti noh ha ka seng kaba jop tang 4 ngut ki MLA ha ka Jylla. Kane kam lah ban long ha ka synshar paidbah. Ka shong ha u paidbah keiñ ki jied ïano ban pynjop kumba long mynta ha kane ka M. P. elekshon, 2024.
Ha ka MLA ki paidbah ki la pynjop bun ïa ka seng NPP bad UDP katba ha kane ka M. P. ki pynjop ïa ka VPP. Namar naduh ba sdang banga la ïoh thep vote ngam ju ai jingkyrshan ïa ki seng heh National party. Nga ai jingkyrshan barobor ïa ki seng riewlum ka Jylla. Hynrei mynta ka kynti nga ïohi ka don ka jingmyntoi shibun ban kyrshan ïa ki National party. Kumta nga la phai khmat ban ai jingkyrshan noh ïa ka seng BJP kaba long ka seng kaba heh ha ka ri India kaba lah ban ïoh bha lyngba ki kam pynroi ïa ka ri, bad ka bym ju peit shiliang ïa kino kino ki nongshong shnong ha ka roi ka par. Hynrei kaba pynlyngngoh ïa nga ba kane ka seng BJP ha kane ka kynti ka khlem pynïeng kyrtong ha kane ka M. P. 2024 hangne ha Jylla jongngi. Kumta ngam banse ban thep noh ïa ka vote jongnga ha ka NPP kaba long ka National party ha North East wat la ka khlem ïoh jingjop ruh.
C. B. Iawphniaw
