Shillong, Jylliew 16
Tang ha ka sekhon ba 23 jong ka jingïalehkai, u Nedim Bajrami ka Albania u la lah ban pyntam da shi kol ïa la ka ri ha ka jingïaleh-kai sdang jong ka lympung Euro 2024 pyrshah ïa ka Italy. Kane ka kol kan dei ruh kaba sted tam ba thep ha ka lympung Euro.
U Bajrami u la lah ban pynkut noh ïa ka rikod kaba la don ha ka jingthep kol kaba sted tam da u Dmitri Kirichenko jong ka Russia ha ka jingïalehkai pyrshah ïa ka Greece ha u 2004. Ha kane ka jingïalehkai, u Dmitri u la khyrwit ïa ka kol ha ka sekhon kaba 67.
U Bajrami, uba ïalehkai na ka club Sassuolo ha Italy, u la lah ban shim kabu ïa ka bol ba la kawang bakla da u Federico Dimarco ka Italy ban khyrwit ïa kane ka kol kaba sted tam.
Hynrei tang hapdeng 5 minit kata ha ka minit ba 11 bad 16 ka Italy ka la ïoh ban thep ar tylli ki kol, kaba la biang pura ban khur ïa ka jingjop bad ki 3 point.
Napdeng ka thup jong ki nongthep kol ba sted tam ha kane ka lympung, ka dei ka kol jong u Luke Shaw ka England ba la thep ha ka jingïalehkai pyrshah ïa ka Italy ha ka final jong ka Euro 2020 kaba la long ha Wembley.
Ha kane ka jingïalehkai, u Shaw u la ïoh ban khyrwit ïa ka kol tang ha ka shim init bad 56 sekhon, kaba haduh mynta ka la don ha ka kyrdan ba hynriew na ki jingthep kol ba sted tam ha kane ka lympung.
