Mairang, Jylliew 20
Ka kynhun ïalehkai jong ka Little Star English Medium Secondary School ka la thaw ïa ka khana pateng ha ka lympung ïalehkai Eastern West Khasi Hills District Level Inter School Subroto Mukherje Cup Football Tournament 2024 ba la pynlong da ka shlem trei kam ka District Sports Officer hadien ba ka la rah ïa ka nam lahduh ha baroh lai tylli ki kyrdan ba kynthup ha ka under-15 ki shynrang, kumjuh ruh ha ka Under-17 ki khynnah shynrang bad kynthei kaba la long mynta u snem.
Ka jingïoh jong ka Little Star ïa kane ka nam ka la wan hadien ba ka rah ïa ka nam lahduh ha ka Under-15 ki shynrang da pynliem 7-0 kol ïa ka St.Joseph Higher Secondary School ha ka jingïakhun final kaba la long ha ka Sngi Palei ha madan Dommawlum, Pyndengumïong.
Nangta ka la ïoh ban rah ruh ïa ka nam lahduh ha ka Under-17 ki shynrang hadien ba ka la lah ban pynliem noh da 2-1 kol ïa ka Nongthliew Higher Secondary School. Kumjuh ruh ka Little Star la ïoh ban khur ïa ka jingjop ha ka Under-17 ki kynthei hadien ba ka la pynliem noh da 5-0 kol ïa ka Mawkhar Presbyterian Secondary School.
Ïa ka nam Best Player ha ka Under-15 la ïoh ban khur da u Mebalajied Warjri na ka Little Star, katba ha ka Under-17 la khur da ka Fornisha Mawlong na ka Mawkhar Presbyterian SS, Sohmylleng bad u Donbynta Mylliem Umlong na ka Nong-thliew HSS.
Ha kane ka sngi pynhap pyrda ïa kane ka lympung la donlang ruh ka DSO, West Khasi Hills ka Kong Balarina Syiem, kumjuh u Bah J. Thyrniang, DSEO ka Eastern West Khasi Hills kum u kongsan kiba la sam ïa ki khusnam.
