Nongstoiñ, Jylliew 21
Ka kynhun ïalehkai jong ka Sib Singh Memorial Govt. HSS ka la rung sha ka final ha ka Under-17 jong ki kynthei bad shynrang, katba ka Dapboklang Giri Memorial SS ha ki Under-15 bad U-17 ki shynrang ha ka lympung ïalehkai West Khasi Hills District Level Inter School Subroto Mukherjee Cup Football Tournament 2024 ba la pynlong da ka shlem treikam ka District Sports Officer.
Ha jingïakhun semi final jong kane ka lympung kaba la long ha ka sngi Thohdieng ha ki ar tylli ki madan ïalehkai kata ha madan NDSA kaba ha Nongpyndeng bad ha madan New Nongstoiñ, ha ki Under-15 ki khynnah shynrang ka St. Anthony’s Secondary School Jaidoh ka la pynliem noh da 2-0 kol ïa ka Lurmangkara SS, Risiang, katba ka Dapboklang Giri Memorial SS ka la pynliem noh da 3-0 kol ïa ka Borsing Secondary School.
Nangta ha ka Under-17 ki shynrang pat ka Sibsingh Memorial Govt. HSS ka la ïoh ban khur ïa ka jingjop hadien ba ka la lah ban pynliem noh da 3-2 kol ïa ka Don Bosco SS, Mawkhlam, katba ka Dapboklang Giri Memorial SS, Porla ka la pynliem noh da 2-0 kol ïa ka Joel Gatphoh HSS, Kynroh.
Shuh shuh haba phai sha ka Under-17 ki kynthei, ka Kyrshai UP& LPS ka la pynliem noh da 2-0 kol ïa ka Don Bosco Mawkhlam, katba ka Sib Singh Memorial Govt. HSS ka la pynliem noh da 2-0 kol ïa ka Dapboklang Giri Memorial Secondary School.
Na ka liang ka shlem treikam ka District Sports Officer ka la pyntip ba ka jingïalehkai final jong kane ka lympung hapoh ka West Khasi Hills District kan long ha ka 24 tarik mynta u bnai ha madan New Nongstoiñ.
La pyntip ruh ba kane ka jingialehkai final kan sdang naduh ka por 9 baje mynstep ha ka Under-17 ki kynthei ha kaba yn ïakhun hapdeng ka Sib Singh Memorial Govt. HSS pyrshah ïa ka Kyrshai Govt LP & UPS. Ha ka por 11 baje ka jingïalehkai final jong ka Under-15 ki shynrang kan long hapdeng ka Dapboklang Giri Memorial SS, Porla ïa ka St. Anthony’s SS, Jaidoh bad ha ka por 1 baje janmiet ha ka Under-17 ki khynnah shynrang kan long hapdeng ka Sibsingh Memorial Govt HSS ïa ka Dapboklang Giri SS, Porla.
