Shillong, Jylliew 21
Ka Spain ka la lah ban pynthikna ban jam sha ka pre-quarter final ha ka Euro 2024 hadien ba la lah ban pynliem noh ïa ka lahduh saw snem mynshwa, ka Italy da 1-0 kol ha ka sngi Thohdieng.
Ka Spain kaba la bat lai sien ïa ka nam lahduh ka la lah ban pyni ïa ka mynsiem ïakhun pyrshah ïa katei ka kynhun kaba khlaiñ bor ha Arena AufSchalke kaba ha Gelsenkirchen ha kaba u Riccardo Calafiori u la ïoh ban pynkhih jar shiphew minit hadien ba la bteng ïa ka jingïakhun jong ka kylla miet.
Lyngba ka jingjop kaba ar ka Spain ka la ïoh ban bat ïa ka kyrdan ba hakhlieh jong ka Group-B ha kaba ka la kamai 6 point bad ka dangsah sa kawei ka jingïakhun kaba khatduh ka ban long ha ka 25 tarik pyrshah ïa ka Albania. Katba ka Italy kaba dangsah ha ka kyrdan ba-ar, kan hap ban pynthikna ha ka jingïalehkai kaba khatduh pyrshah ïa ka Croatia ka ban long ha ka Lah Sngi U Blei ka ban long ha Leipzig.
Ha katei ka jingïakhun u rangapkol ka Italy u Gianluigi Donnarumma u la lah ban pyllait na ka jingshah thep na kiba bun ki jingpyrshang, katba u Lamine Yamal u la ïoh ban shut najan ha ka kylla miet na ka bynta ka Spain bad u Nico Williams u la ïoh ban shut ha kaba ka la leit dei na diengkol.
“Nga sngewkmen ba kum ka kynhun ka la lah ban pynthikna ban ïoh rung sha kawei pat ka wat jingïakhun. Kane ka dei lyngba ka jingïakhun tyngeh jong ka kynhun,” la pynpw u coach ka Spain u Luis de la Fuente.
