Washington, Jylliew:
Ki shipai United States ha ka Sngi Palei ki la pynbna ba ki la ioh ban siat pynjulor ia 4 tylli ki ‘Nautical drone’ jong ka Houthi bad 2 tylli pat ki ‘Arial Drone’ kiba leit poi sha ka bynta jong ka duriaw Red Sea kaba hap hapoh ka jingkhmih jong ka Yemen.
Namar la ong ba ki lehnoh Houthi na Yemen ki la phah ia kitei ki drone sha katei ka bynta jong ka duriaw Red Sea ban thombor ia kitei ki jhad kiba leit ban poi sha katei ka bynta ka duriaw Red Sea bad Gulf of Aden kumba ki ju leh man ka por naduh u Naiwieng jong u snem ba la lah hadien ka jingleit hiar thma jong ka Israel pyrshah ia ka kynhun lehnoh Hamas hapoh Gaza Strip.
Kumta, la ong ba ka United States bad ki ri kiba iateh lok badka kynthup ia ka Britain, ki la pynphai kylliang ia kitei ki kam thombor ka Houthi da kaba leit ther bom kylla sha ki thaiñ khappud jong ka Yemen ban pynhiar kput halor ka jingleh jong kitei ki lehnoh jong katei ka ri.
Ka US Central Command (CENTCOM) ha ka jingpynbna ba ka la pyllait ha ka miet Sngi Palei, ka la pyntip ba ki shipai jongka ki la ioh ban tehlakam ia ki drone ba la phah da ki lehnoh Houthi sha ki bynta ka duriaw Red Sea ha katei ka miet.
Kane ka long hadien shi sngi ba ka CENTCOM ka la pyntip ba ki shipai US ki la ioh ban thombor ia ki jaka treikam jong kitei ki lehnoh ha Yemen.
Dang shen ha kane hi ka taiew, la ong ba kawei ka jhad kaba leit poi sha katei ka bynta jong katei ka duriaw, ka la shah thombor ha ki lehnoh Houthi bad ka la ngam syndon ha katei ka duriaw watla ia kiba shong hapoh la ioh ban pyllait im noh da ki tnat iarap.
Hynrei u maji jong katei ka jhad uba long u nongshong shnong ka Philipines, u la khlad bad duh noh ia ka jingim ha katei ka jingjia bad ka jing ngam jong katei ka jhad kit mar ha katei ka jingjia.
Kumjuh ruh uwei pat u dkhot ka jhad kit mar u la mynsaw jur ha kawei pat ka jingjia ba katei kawei pat ka jhad ka la shah thombor ha kitei hi ki lehnoh Houthi katba ka dang iaid lyngba ia katei ka bynta jong ka duriaw Red Sea, ha kaba kitei ki bor pyniaid jong katei ka jhad baroh ki la hap ban shu phet krad noh na katei ka duriaw bad ban ieh noh ia katei ka jhad ha katei hi ka jaka ba ka la shah siat bad shah ther bom ha ki Houthi.
