Houston, Jylliew:
U Lat ka Louisiana ha ka Sngi Balang, u la soi ia ka jingtyrwa ban wanrah jingkylla ha ka jingim ki khun khynnah jong kane ka nongbah da kaba wah ia ki shiphew hukum (Ten Commandments) ha man ki skul bad ha man ki karma klas jong ki skul kiba don ha ka nongbah bad kumjuh ruh ha ka ri lada ioh ia ka jingmynjur lang jong baroh ki bor ba dei khmih ka ri.
La ong ba kane ka long ka sien ba nyngkong eh ha katei ka ri ba ki nongialam lane ki bor pyniaid kin wanrah ia kane ka jingtyrwa ban wah ia ki jingthoh na ki shiphew hukum kumba la tyrwa ban sdang pyntreikam noh ia kane ka jingthmu naduh kaba sdang jong u snem 2025 u ban wan ha man ki karma pule jong baroh ki skul kiba don ha katei ka ri.
Namar utei u Lat u la ong ruh ba lada ki bor pyniaid bad ki bor ka aiñ jong ka ri ki treikam bad ieng shisha na ka bynta ka hok jong u paidbah, kane ruh ka long kawei na ki aiñ kaba u nongialam ba la buh da u Blei; u Moses u la ai bad sam ha ki nongbud jong u bad ha ka pyrthei baroh kawei ba ki dei ban bat ia kitei ki aiñ kiba la buh da u Blei nongbuh- nongthaw ba ki briew ki dei ban bat kumba ki bat ia ki aiñ ba la buh da u briew ha ka imlang- sahlang.
Na ka liang ka tnat American Civil Liberties Union (ACLU) ka la mynjur ban rah ia katei ka mat sha ka Iingbishar na ka bynta ban ioh ban iatai bad ban peit thuh la ka long shisha ne em ka mat kaba kongsan bad ban ioh ruh ia ka jingmynjur lang jong baroh.
