New York, Naitung:
Kawei ka samla pule nong India, kaba dang 25 snem ka rta, ka la khlad noh ha ka jingjia shah tynrah kali ha ki bynta ba shatei lam mihngi jong ka New York, kaba la wanrah ia ka jingkyndit bad jingsngewsih kaba khraw ia kiba ha iing- ha sem jongka ha ka jylla Andhra Pradesh jong ka ri India. Ka Prasanna Atluri, kaba dang shu dep pule dang shen na ka Lubin School of Business jong ka Pace University, ka la khlad noh hadien ba kawei pat ka kali, ka la tynrah ia ka kali kaba ka shong da ka jingbakla jong katei ka kali kaba wan tynrah nadien.
Katkum ka jingïathuh jong kiba haïing jong ka, ka Atluri ka dang leit sha kawei ka temple ryngkat bad ki paralok jong ka ha ka por ba kane ka jingjia aksiden ka la jia. Katba ka kali jong ki ka dang ap ha kawei ka dak iaid kali, la iathuh ba ka la shah tynrah ha kawei pat ka kali kaba iaid stet nadien.
Kawei pat ka longkmie kaba leit lang bad u Atluri ruh ka la khlad noh ha katei ka jingshah tynrah liengsuin ha ka 5 tarik u Jylliew, katba u nongleit jingleit uba lai u la mynsaw jur bad la pynkynriah noh ia u sha hospital, ha kaba u dang shah sumar.
U Atluri u dei uba wan na ka longïing kaba rit paid ha ka shnong Moolapadu kaba don ha Ibrahimpatnam mandal jong ka NTR distrik. La iathuh ba u kpa jong ka, U Atluri Vasantha Rao, u dei u nongrep, katba ka kmie jong ka, ka pyniaid ia kawei ka jaka shna pla kaba rit. Ka Atluri, ka dang shu pyndep ia ka jingpule jong ka ha US bad ka dang wad ia ki lad ioh kam ioh jam, la iathuh kiba ha iing jong ka.
Hadien katei ka jingjia ba sngewsih, u para jong ka Atluri, u Ravi Kumar Atluri, u la pynlong ia ka jinglum pisa ban iarap ia katei ka longiing ban lum pisa ban wanrah biang ia ka met iap jong ka sha India.
“Ka Prasanna ka dei ka mawjam jong ka longïing jong ka bad u briew uba baroh ki shaniah na ka bynta ka jingïalam, ka jingkyrshan ha ka jingsngew, bad ka jingshong suk ha ka liang ka pisa tyngka. Wat haba ka dang pynïaid ïa la ka jong ka ram pule jong ka, kam ju artatien ban ïarap ïa kiwei pat,” u la thoh.
Kane ka jingïakhih ka la ïoh ïa ka jingkyrshan kaba khraw, ha kaba ki longïing ki la dep ban lum palat $40,000 sha ka thong kaba $75,000. Kane ka pisa ka long ban kyrshan ia ki jingpynkhreh ban tep, ban kit ia ka met jong ka sha India, ban siew ia ka bai leit bai wan jong kiba ha iing ha sem, bad ban siew ia ka ram pule jong ka kaba dang sahteng.
Ka longïing jong ka Atluri ka la pan jingïarap ruh na ki bor synshar ban ïarap ban pyndep ïa ki jingdonkam bad ban wanrah biang ïa ka met jong ka sha ka jaka ba ka la kha na ka bynta ka jingleh niam kaba khatduh.
