Jop ka Venezuela ïa ka Ecuador, ka Mexico ïa ka Jamaica ha ka lympung Copa America

Ka jingïalehkai ka la long kaba itynnad bad ïakhaid bha, ha kaba ha ka kylla step ym shym la don kiba la ïoh ban pynkhih jar.

Shillong, Jylliew 23           

Ka kol kaba la ïoh ban thep da u Jhonder Cadiz bad u Eduard Bello ka la pynlong ïa ka Venezuela ban jop da 2-1 kol ha ka jingïakhun pyrshah ïa ka Ecuador ha ka lympung Copa America kaba la long ha ka sngi Saitjaiñ.

Haba phai sha kane ka jingïalehkai ha ka Group B, ka Ecuador tang ha ka minit kaba 22 jong ka jingïalehkai ka la shah pynduna noh sha 10 ngut ki rangïalehkai, kata hadien ba u rangïalehkai shakhmat jong ka, u Enner Valencia u la shah beh noh hadien ba u la shah sei red card ha ka jingïakhun kaba la long ha Levi Stadium.

Une u rangïalehkai ba la 34 snem ka rta, u la kum kynjat da ka kjat ïa ka shadem jong u rangïalehkai dien ka Venezuela u Jose Martinez, ha ka por ba u la ïakhun ban kynjat ïa ka bol kaba la sied shajrong hadien ba ka la hap ha madan, ha kaba u la shah sei da ka ‘yellow card’ hynrei hadien ka jingpeit bniah lyngba ka VAR u la shah sei syndon da ka ‘red card’.

Hynrei kane kam shym la pynduh mynsiem, ha kaba ki rangïalehkai ka Ecuador ki la ïakhun tyngeh bad dei ha ka minit ba 40 ba ki la ïoh ban khyrwit ïa ka kol kaba nyngkong ba la thep da u Jeremy Sarmiento bad ban tam da 1-0 kol haduh ba kut ka kylla step.

Haba bteng ïa ka kylla miet, u Coach ka Venezuela u Fernando Batista u la pynmih bujli noh da u Cadiz bad Bello ha kaba kine baroh ar, ki la ïoh ban khyrwit mar shi kol bad pynlong syndon ïa ka Venezuela ban jop da 2-1 kol.

Haba phai sha kawei pat ka jingïalehkai jong kane ka lympung kaba la long ha kane ka sngi, ka Mexico ka la lah ban pynliem noh ïa ka Jamaica da 1-0 kol.

Ka jingïalehkai ka la long kaba itynnad bad ïakhaid bha, ha kaba ha ka kylla step ym shym la don kiba la ïoh ban pynkhih jar.

Haba bteng ïa ka kylla miet, baroh ar liang ki la ïakhun tyngeh hynrei dei tad ha ka minit ba 69 ba u Gerardo Arteaga u la ïoh ban khyrwit ïa ka shi kol jong ka Mexico kaba la biang pura ban khur ïa ka jingjop bad ruh ki 3 point pura.

Kumba long mynta na ka Group-B, ka Venezuela bad ka Mexico ki la kamai mar 3 point.