Shillong, Jylliew 24
Ka Germany ka la ïoh ba bat ïa ka kyrdan hakhlieh jong ka Group-A ha ka Euro 2024 hadien ba u Niclas Fuellkrug u la lah ban pynphai kylla na ka bynta ban pynïakhaid mar 1-1 kol pyrshah ïa ka Switzerland ha ka lah sngi U Blei.
Ha kane ka jingïa-khaid ka la pynlong ruh ïa ka Switzerland ka la ïoh rung lang bad ka Germany sha ka pre-quarter final, katba ka Hungary bad ka Scotland ki la hap ban leit phai noh sha la iing.
Ha kane ka jingïaleh-kai kaba khatduh jong katei ka group, ka jingïa-khun ka la long kaba ïakhaid bha ha kaba baroh ar ki kynhun ki la ïakhun tyngeh namar ki donkam ban khur ïa ka jingjop bad khamtam eh ka Switzer-land kaba dangdonkam ban pynthikna.
Te kumta ka Switzer-land ka la ïoh ban pynkhih jar nyngkong eh lyngba u Dan Ndoye ha ka minit kaba 28 bad kane la wan lyngba ka jingïarap pynbuh da u Remo Freuler. Kane ka shi kol ka la nangpynïoh mynsiem ïa ki rangïalehkai katei ka kynhun na ka bynta ban ïai bteng ban ïakhun tyngeh shuh shuh.
Watla ka Germany ka la pyrshang ban ïakhun tyngeh na ka bynta ban pynphai, hynrei kam shym la lah ban pynurlong na ka daw ka jingïashan tyngeh ki rangïalehkai ‘dien ka Switzerland. Hashwa ban wai artad ka Germany ka la lah ban pynurlong lyngba u Fuellkrug ha ka minit kab 90+2 hadien ka jingïarap pynbuh da u David Raum.
Haba phai sha kawei pat ka jingïakhun jong kane ka group, ka Hungary ka la lah ban pynliem noh ïa ka Scotland lyngba ka shi kol ba la thep da u Kevin Csoboth ha ka minit kaba 90+10.
Te kumta ka Germany ka la kamai 7 point na ka bynta ban bat ïa ka kyrdan ba hakhlieh jong ka Group-A, ka Switzerland kaba la wan ba-ar ka la kamai 5 point, kiwei pat ki kynhun kiba la bud nadien ki long ka Hungary (3 point) bad ka Scotland (1 point).
