Jowai, Jylliew 24
Ka North Liberty HSS na Jowai bad ka Dominic English School na Namdong ki la long napdeng ar tylli ki skul kiba la rah ïa ka nam lahduh ha ka District Level Inter School Subroto Mukherjee Cup ba la pynïaid da ka shlem treikam u District Sports Officer, West Jaiñtia Hills.
Baroh lai tylli ki jingïakhun final la pynlong ha ka Lah Sngi U Blei ha madan Kiang Nangbah Stadium kaba ha Ladthalaboh kaba Jowai.
Ki ‘rang bad ki ‘thei ïalehkai ka North Liberty HS School ki la ïoh ban rah ïa ka nam lahduh ha ka Under-17, katba ka Dominic English Upper Primary School ha ka Under-15 ki shynrang.
Ha ka jingïakhun final, ki ‘thei ïalehkai ka North Liberty HSS ki la lah ban pynliem noh ïa ka Kiang Nangbah Govt. HSS da 7-0 kol. Ka Deigratia Dan ka la khyrwit da ka hat-trick hadien ba ka la ïoh ban thep ha ka minit kaba 9, 45 & 54, ka Peacefuly Pohplet ka la thep ar kol ha ka minit kaba 16 & 25, kata ïa ki ar kol la thep da ka Alisha Pyrtuh bad ka Eiladki Ksoo ha ka minit kaba 48 bad 56.
Ha ka jingïakhun jong ki shynrang, ka North Liberty ka la pynliem noh ïa ka Govt Boys HSS da 2-0 kol. Ïa kine ki ar tylli ki kol la thep da u J. Nial Rasmut ha ka minit kaba 8 bad u Rio Marboh ha ka minit kaba 39.
Haba phai sha ka kyrdan ïalehkai Under-15 ki shynrang, ka Dominic English Upper Primary School, Namdong-A ka la pynliem noh ïa ka St. Dominic HS School, Mowkyndeng da 1-0 kol. Ïa kane ka shi kol la thep da u Aibor Wahlang ha ka minit kaba 7.
Kumta da kane ka nam jop kine ki artylli ki skul kin mihkhmat ïa ka District sha ka State Level Football Tournament ka ban sa pynlong shen da ka tnad Directorate of Sports & Youth Affairs ha nongbah Shillong.
Ïa ki khusnam la sam da u MLA Jowai u Bah Wailadmiki Shylla uba long kum u kongsan ha ka jingïadonlang u DSO bad uba long u Asst. Director ka tnat ïalehkai u Bah Khroobok Passah, u Working President ka West Jaiñtia District Sports Association Bah EMH Passah, Vice Persident ka WJDSA Bah Patrick Lamare, Working President ka East Jaintia Hills District Football Association Bah James Sutnga, u General Secretary ka Saipung Block Sports Association u Bah Rimi Shadap nalor ki principal, ki nonghikai bad kiwei kiwei kiba shah khot sngewbha.
