Dagestan, Jylliew
Ki bor pyniaid ka Russia ha ka Sngi U Blei ki la pyntip ba kumba 15 ngut ki briew ki la khlad kynthup ia ki pulit bad uwei u nongialam niam namar ka jingleit thombor jong ki runar ki bym shym don jingithuh ha ki jaka mane bad ki jaka leh niam bad ruh ha kawei ka thanat pulit ha ki thaiñ Shatei jong ka nongbah Dagestan ha ka Sngi U Blei. Katei ka jingleit thombor jong kitei ki runar ka long ha ka nongbah Makhachkala kaba heh tam jong ka Dagestan bad ha ki bynta khappud jong ka nongbah Derbent, ha kaba u Lat Sergei Melikov u la pharep beit ba katei ka kam thombor kan dei beit jong ki kynhun lehnoh.
Ki heh ka Russia ki la iathuh ruh ba ki pulit ki la ioh ban siat iap ia 4 ngut ki runar hapoh Makhach-kala bad 2 ngut kiwei pat ha Derbent hapdeng ka jingiakhun bad kitei ki riew kieng atiar ki bym don jing-ithuh.
U Melikov u la iathuh ba napdeng jong kitei kiba khlad, kynthup lang ruh ia kitei ki pulit kiba kyllon iap hapdeng ka jingiakhun bad kitei ki runar, katto katne ngut ki dei ki ‘riew paidbah kynthup ia uwei u nong-ialam niam uba ialam ia ka jaka mane hapoh Derbent la kumba 40 snem mynta.
Hynrei, utei u nong-ialam u la ong ba ka Russia ka tip shai mano kito kiba don kti ha katei ka kam thombor bad ia ka jingthmu ba sha lyndet jong kitei ki runar.
Kumjuh ruh u la ong ba ki nongialam ka ri ki sngewthuh ba ka thma ka lah ban wan jia hapoh iing ruh kumjuh, ki tip shai ia kata bad kumta ki hap ban pdiang bad ban ialeh pyrshah ia kum kine ki jingeh kiba lah ban wan jia biang ha kano- kano ka por ka bym lah ban tip.
Namar kata, la ong ba ka kynhun wad bniah jong ka ri kan wad bad thwet ia kito kiba don bynta ha katei ka jingjia, kynthup ia kito kiba nabar ri lada ki dei kiba kynshoit bad phah ban leh ia katei ka kam thombor hapoh ka ri.
Ka Russia ka la pyntip ba ka Investigative Committee jong ka Russia, ka la phah wad bniah halor katei ka kam thombor kaba la jia ha ka Sngi U Blei bad haduh kane ka step Lah Sngi U Blei, ym pat shym la don ba kam ne shim jingkit khlieh halor katei ka jingjia ha katei ka sngi.
Ki bor pyniaid ka Derbent ki la iathuh ba baroh 2 tylli ki jaka hikai bad ki iingmane kiba don ha katei ka nongbah ki la julor bad shah bam duh ha ka ding kaba klang na ka jingbthei ki tiar kiba don ha katei ka jaka ha ka jingleit synreit kuli jong kitei ki runar.
Kumta, la ong ba kane ka jingjia ka long ruh tang hadien 3 bnai ba 145 ngut ki briew ki la khlad na ka jingshah thombor bad jingshah pynbthei bom ka tamasa ka put- ka tem ‘Concert Hall’ hapoh ka nongbah Moscow, ha kaba ka kynhun lehnoh Islmaic States (IS) ka la shim jingkit khlieh hi da lade halor katei ka jingjia thombor ba shyrkhei ba ka Russia kam lah ban mutdur ba kan ioh mad ha kum kane ka por ba ka dang iakhun thma pyrshah ia ka Ukraine.
