Shillong, Jylliew 24
Ka Myntri ba khmih ïa ka tnat ka Koit ka Khiah ka Kong Ampareen Lyngdoh ha ka Lah Sngi U Blei ka la plie paidbah ïa ka kor X-ray ha ka Primary Health Centre (PHC) kaba don ha Smit ha ka jingdon lang u Dr. Joram Beda kum Commissioner bad Secretary ka tnat ka koit ka khiah bad ka Director ka Dr. FV Kharshiing.
Haba kren ha kane ka jingïalang plie, ka Kong Ampareen ka la ong ba ka jingwan jong ka sha kane ka jaka kam dei tang ban plie ïa kane ka kor X-ray hynrei ka wan ruh ban jngoh ïa ka rukom treikam jong kane ka jaka ai jingsumar bad ruh ban peit ïa ka jingkwah ka dorbar shnong ban pynkiew ïa kane ka jaka ai jingsumar na ka PHC sha CHC kumba la kyrpad da ka dorbar shnong.
Ka Myntri ka la ong ba donkam ban don ka jingïajan hapdeng ki nongkitkam shnong bad ki ophisar ban pynpoi sha ka thong bad ka la ong ïa ki ophisar ban peit ïa ka jingpan jong ki rangbah shnong.
Ka la kyntu ïa ki ophisar ba kin ïatreilang bad ki dorbar shnong ban pynthikna ïa ka rukom ïaid beit ïaid ryntih jong kane ka PHC kaba don ha Smit.
