Bertina Lyngdoh
Shisien ba la leit, phim ju wan phai shuh, la ngi kwah eh ïa phi ban ïoh biang sa shisien. La ka dei ki jingkmen ne jingsngewsih, ka koit ka khiah ne ka pang ka shitom, la ïa kino kino ruh ba tang ki jingkynmaw te ïa phi ki ïa ba la leit noh. Dang step mynba ki khmat ki plie, ngi ïohi ïa jingshai jong ka sngi, kumta, ngi tip ba ngi dang don ïa ka mynta. Ka shibit ne ka lashai, ei ba lah ban tip lypa, hynrei sa tang ki jingkyrmen ne lehse ki jingpynkhreh lypa khamtam eh ïa ka mynsiem.
Kine keiñ ki dei kita ki lai ki jingshisha ba briew u im ha ka. ïa kaba la leit, ngim lah ban pynwan phai biang, la ka dei ka sngewbha ne sngewsih. Ki bun kiei kiei ha kaba ngi kynmaw ïa ki por ba la leit. Ki por ba la leit noh ha ka jingshisha ki hikai ïa ngi kumno ban im bha na ka bynta ki sngi ki ban dang wan. Ba briew hi um lah biang, ki hikai ruh ban klet bad map noh. Nalor kine, ka hikai ruh ban nym pyrkhat ïa kaba leh dep hynrei ïa ka mynta bad ka lashai. Ka mynta ka long ka jingshisha kaba kongsan bha ba briew u im haka. Haba klongsnam u dang tied, ngi sngewthuh ba ngi dang don ka por Mynta jong ngi. Kumta, ym ban bun jingmut jingpyrkhat hynrei ïaroh bad ainguh I’u Blei namar ka mynta jong ngi. Trei la dei ban trei, bam la dei ban bam, thiah la dei ban thiah, namar shisngi ban im ruh katno ka long kaba kordor bha. Ka por ka ïaid stet, ba kam ju ap ïano ïano ruh, namarkata ka wan sa ka lashai ïa kaba briew u im ha kane ka jingshisha. ïa ka lashai ym don ba tip lypa, hynrei dei tang uba nalor, uba tip ïa ka lashai. Kum ki briew, nalor ka jingpynkhreh lypa ïa ka mynsiem jongngi, ki don pat sa kiwei ruh ki jingpynkhreh ba kum u briew ngi ju pynkhreh lypa. Kum ka nuksa, ka jingpynkhreh ban nang kham heh ka khaïi ka pateng, ka jingpynkhreh ïa ki eksamin bapher bapher, ka jingpynkhreh ban kynshew ïa ka tyngka ne ka bam ka dih. Nalor kine, kum u briew naba u tlot, lehse don kiba ju pynkhreh ruh ïa ki kam sniew lane kumno ban pynkynrei ïa ki jingsniew. Kane te ka long ka jingma jong ka lashai.
Kumta, kine ki lai ki jingshisha, ba briew te um lah lait. La bha ruh te ha ki, bad la sniew ruh te dei haki. Kaba bha eh ka long ba lada ngi lah ban im bha kata ha baroh lai ki jingshisha. Namarkata, map bad klet bad im ïaka mynta, bad kyrmen bha ïa ka lashai. Ka por kam hikai ïa kaba bha ne ba sniew, hynrei ka shong hangi kumno ban im ha kine ki lai ki jingshisha.
