U Sebastian kum rephri ba nyngkong na West Jaiñtia ban don ïa ka kyrdan Panel B jong ka BFI

U Sebastian u la shim ïa ka bynta ban pynïaid (officiated) ha ka 73rd Junior National Basketball Championship ha Bhubaneswar kaba la long ha u bnai Rymphang 2024.

Jowai, Jylliew 24

U Sebastian Suting u la long uba nyngkong eh na ki nongshong shnong napoh West Jaiñtia Hills ban ïohpdiang ïa ka kyrdan Panel B BFI Referee.

Ha ka shithi ba la phah sha u General Secretary ka Meghalaya Basketball Association, na ka liang u Secretary General jong ka Basketball Federation of India (BFI) u la pynthikna halor ka jingmynjur ïa kane ka jingjied sha ka Panels A & B ha ka jingïalang ka jong ki kaba la long ha Chennai ha ka 8 tarik mynta u bnai.

Nalor u Sebastian Suting, kiwei kiba la shah jied na ka Jylla ki long u Fring Frank Lyngdoh Lyngkhoi bad u Rakbir Lishan B Sangma.

U Sebastian u la shim ïa ka bynta ban pynïaid (officiated) ha ka 73rd Junior National Basketball Championship ha Bhubaneswar kaba la long ha u bnai Rymphang 2024.

U Fring Frank Lyngdoh Lyngkhoi bad u Rakbir Lishan B Sangma ki la ïashim bynta ha ka 48th Sub-Junior National Basketball Championship kaba la long ha Puducherry ha u Nailar 2023.

U Sebastian u la ai khublei kyrpang ia u Bah James Mardor Bamon uba dei u BFI Panel A referee halor ka jingkyrshan ka jong u. U Sebastian u la ong, “Ban kylla long u National Referee uba nyngkong napoh West Jaiñtia Hills ka dei ka khusnam kaba khraw halor ka jingtrei shitom kaba nga la ïakynduh. Ban tip ïa baroh ki kyndon kiba ïadei bad ka jingïalehkai Basketball bad ban pynneh ïa ka jinglong ha ka met ka phad ka dei ka bynta kaba shem jingeh shibun khamtam namar ka jingduna ïa ki lympung ïalehkai hapoh ka district jong ngi.”

Ha kajuh ka por u kyntu ruh ïa ki nongïalehkai napoh West Jaiñtia Hills ba kin trei minot bad kyrpad ruh ïa ki Basketball Association hapoh ka district ba kin pynlong ïa ki lympung ïalehkai kum ki Inter School Tournament khnang ban pynshlur bad ai mynsiem ïa ki khynnah ba don sap kiba dangkhie dangsan.