Guwahati, Jylliew:
Ha kawei ka jingjia kaba sngewshyrkhei kaba la jia ha Kokrajhar, uwei u briew ba la 35 snem ka rta bad kyrni ha ka jingdih drok u la shah kynnoh ba u la pynïap ïa la ka jong ka kmie naba ka la kyntait ban ai pisa ïa u na ka bynta ban ïoh thied drok. Une uba la shah kynnoh u dei u khun jong u Principal barim ka Kokrajhar Government College u Prof Nagen Brahma, ba shong ba sah ha Kokrajhar Ward No. 8 Mwiderkhoro (Hatimatha).
Kumba la ïathuh ka tyllong khubor, la ong ba une u khun ïa uba la tip kyrteng kum u Padopani Brahma u la pynïap ïala kajong ka kmie, ka Parbati Brahma, kaba la 80 snem ka rta. Kane ka jingjia ka la jia haba kane ka kmie kam shym la ai pisa sha une u khun ba un thied drok. U Padopani u la tied ïa ka kmie na ka khlieh da ka tiar ba nep naba kam ai pisa ïa u ha kaba ka la ïap syndon. U Padopani u la shahkem noh ha ki pulit bad ka jingtohkit ha kaba ïadei bad ka jingjia ka dang ïaid shakhmat.
