Shillong, Jylliew 26
Ar ngut ki rangïalehkai Under-17 ka Jylla ki la paw ha ka thup jong 31 ngut ki rangïalehkai ki ban pynkhreh na ka bynta ka SAFF U17 Men’s Championship 2024.
Kine ki kynthup ïa u Banlamkupar Rynjah bad u Manbhakupar Malngiang hadien ba ka All India Football Federation ka la pynbna ha ka sngi Balang ïa ki kyrteng jong 31 ngut ki rangïalehkai kiba la shah jied na ka bynta ka prokram kilanmet ka ban long ha Srinagar naduh 8 tarik u Naitung mynta u snem.
Ha katei ka lympung yn wan ïashim bynta da khyndai tylli ki ri ha kaba yn pynïalehkai ha Bhutan naduh 18 haduh 28 tarik u Nailur. Ka India ka la shah kynthup lang ryngkat ka Maldives bad ka Bangladesh kiba don ha ka Group-A, katba ka Bhutan, Nepal, Pakistan bad ka Sri Lanka ki la don ha ka Group-B.
Kat kum ka kyrwoh jong katei ka synjuk ïalehkai ka ri ka la pynpaw ba wat la ka lympung ïalehkai jong ka SAFF ka la poi sha kaba kut, hynrei ka kynhun ïalehkai kan ïai bteng ban kilanmet ha Srinagar na ka bynta ka AFC U17 Asian Cup 2025 (Qualifiers) ka ban long ha u Risaw mynta u snem ha Thailand.
Ki katto katne ki rangïalehkai kiba la paw hapoh kane ka thup ki dei kiba la don bynta bad ka kynhun ïalehkai ka ri kaba la khur ïa ka jingjop ha ka SAFF Men’s U16 Cham-pionship kaba la long ha Nailur jong u snem ba la lah ha Bhutan.
Na ka liang u coach u Ishfaq Ahmed u la ong, “Nga sngew ban long ba kane ka jingai jinghikai ïa ka kynhun ka long kaba biang bha na ka bynta ban sei ïa ki khynnah ïalehkai kiba dangkhie dangsan. Kiba bun na ki rangïalehkai ki dei kiba ïalehkai ha ka U-17 youth league, katba ïa kiwei pat jied na ka kynhun ïalehkai ka jong ngi.”
“Ka long kaba biang eh ba ïa kane ka jingkilanmet yn pynlong ha Srinagar. Namar ïa katei ka lympung yn pynlong ha Bhutan, ka long kaba biang eh ïa ki rangïalehkai namar ki ïoh ban kilanmet ha ka jaka ba long kynjang na sla duriaw.”
