Las Vegas, Jylliew:
Ki pulit ka North Las Vegas ha ka Sngi Ba-ar ki la ioh kem ia u briew uba suba don kti ban pyniap ia 5 ngut ki briew na kawei ka jaka iew.
Katkum ka khubor na ka Review-Journal na Las Vegas, la ong ba nalor jong kitei ki 5 ngut kiba shah siat ha utei u runar, kawei dei ka khynnah 13 snem kaba la shah siat lang bad mynsaw jur bad ia mynta ka dang don hapdeng ka jingsumar hapoh ka hospital kaba don ha katei hi ka nongbah.
Hynrei na ka liang ka tnat pulit ka North Las Vegas kam pat shym la pynphai ktien ne jubab halor ki jingkylli kiba iadei bad katei ka jingjia ne ka jingioh kem ia utei u suba don kti.
Ki pulit ki la pynithuh ia utei u suba don kti ba la ioh kem kum u Eric Adams, 57 snem ka rta. La ong ba ki pulit ki la kem noh ia u hadien ba ki suba ba dei ma u uba don kti ha katei ka jingsynreit kuli ha ar tylli ki bynta jong katei ka iingmala kaba dei ka jaka iew bad kaba la jia ruh ha ka Sngi Nyngkong ha kajuh ka sngi.
Wat la katta, ki pulit kim shym la pynshai bniah shaphang katei ka jingjia ne ka daw jong katei ka jingjia ba utei u briew u leit ban thombor ia kiba don ha katei ka jaka ha katei ka sngi. Nalor kata, ki pulit kim shym pynpaw ruh ha kano ka dur ki ioh ban kem noh ia u Adam bad kumno ki tip ba dei ma u uba leh ia katei ka kam thombor ha katei ka jingjia.
Kumjuh ruh la ong ba ia ka kyrteng jong kitei kiba khlad bad mynsaw baroh ym pat shym la pynpaw paidbah hynrei la shu pyntip ba napdeng jong kitei ki 5 ngut kiba khlad, 4 ngut ki dei ki kynthei bad uwei u shynrang.
