Shillong, Jylliew 30
Ka lympung 1st Hynñiewtrep U-16 Football League 2024 kaba la pynlong da ka Sports Cell jong ka Hynñiewtrep Youths’ Council (HYC) Sengkmie ka la jam sha ka semi-final bad ïa ki jingïakhun yn pynlong ha ka 3 tarik Naitung, 2024.
Ki saw tylli ki kynhun kiba la ïoh rung sha ka semi-final jong katei ka lympung ki long ka PFR Football Academy Shillong Center, ka Tanaw Football Club, ka Nangiaikiew Football Association bad ka Na Rympei Football Club.
Kine ki saw tylli ki club ki la khur ïa ka jingjop ha ka jingïalehkai kaba la dep, kaba la long ruh ka jingïalehkai kaba shongshit bad itynnad bha. Ha kine ki jingïalehkai ka la don ruh ka jingsam ïa ka khusnam ‘Player of the Match’ ha kaba na ka PFR la ïoh da u Kyrmenskhem Dkhar, na ka Tanaw FC la ïoh da u Donboklang Jana, na ka Nangiaikiew FA la ïoh da u Bantei Mujai bad na ka Na Rympei la ïoh da u Scolin Syngkli.
Na ka liang ka Sports Cell ka HYC ka la pyntip ba ïa ka jingïalehkai semi-final yn pynlong ha ka 3 tarik u Naitung bad ka jingïakhun kan long hapdeng ka PFR Football Academy Shillong pyrshah ïa ka Tanaw FC ha ka por 12.30 mynsngi bad ka jingïalehkai kaba bud kan long hapdeng ka Nangiaikiew FA pyrshah ïa ka Na Rympei FC ha ka por 2 baje mynsngi.
