Shillong, Jylliew 30
Ka Lamerphylla Damesha Kharsati ka la wanrah burom ïa ka Ri da kaba ïoh khur ïa ka takma rnong ha ka lympung 23rd Milo Open International Karate Tournament kaba la long ha Kuala Lumpur, Malaysia.
Haba ïashim bynta ha ka jingkhia ba 68 kilo ha ka Senior Female jong ka kumite, ka samla Lamer-phylla ka la lah ban pynpaw ïa ka sap ba tbit ha kane ka lympung kaba la long hapoh ka Titi-wangsa Indoor Stadium naduh ka 26 tarik haduh ka 30 tarik mynta u bnai.
Kane ka jingjop bad kiew jong ka samla Lamerphylla Kharsati ha kane ka lympung kaba heh, ka la wan na ka jingtrei shitom bad kilan met kaba shi bnai lynter bad ka jingaiti met bad mynsiem ha kane ka jingïalehkai.
Da kaba khur ïa ka takma rnong, ym tang ba ka la wanrah burom ïa ka Ri India hynrei ban pynpaw ruh ba ka dang lah ban kot shuh sa sha kiwei pat ki kyrdan ba kham shajrong lyngba ka jingbteng ban kyrshan bad jingïarap.
“Ka jingïakhun ha kane ka rynsan ba ïashim bynta da ki ri ka pyrthei bad ban khur ïa ka takma ka long shisha ka jingplie lynti ha ka jingim ïalehkai ka jong nga. Nga dap da ka jingsngewnguh na ka bynta ka kabu ba la ïoh ban mihkhmat ïa ka Ri bad ngan bteng ban ïakhun tyngeh ban khur nam lahduh ha ki jingïa-kop ban wan,” la ong ka samla Lamerphylla.
