Shillong, Naitung 07
Ka Na Rympei Football Club ka la rah ïa ka nam lahduh jong ka lympung 1st Hynñiewtrep U-16 Football League ba la pynlong da ka Sports Cell ka Hynñiewtrep Youth Council (HYC) Sengkmie.
Ka jingïoh rah jong ka Na Rympei ïa ka nam lahduh ka la wan hadien ba ka la pynliem noh ïa ka Tanaw Football Club lyngba ka jingïashut tie-breaker ha ka final kaba la long ha ka Sngi Saitjaiñ.
Ka jingïalehkai final hapdeng kitei ar tylli ki club ka la long kaba shongshit bad itynnad, bad haba phai sha ka jingïakhun jong ka kylla step ka Tanaw FC ka la ïoh ban pynkhih nyngkong ïa ka jar bad ban tam da shi kol. Hynrei haba bteng ïa ka jingïakhun jong ka kylla miet bad shwa ban kut artad ka por sa tang ar minit ka Na Rympei ka la lah ban pynïakhaid da kaba ïoh pynkhih ïa ka jar.
Kumta haba ki nongpynïaid ki la rah sha ka ‘extra time’ ban ïoh ïa ka nongjop hynrei hangne ruh kim shym la lah satia ban ïoh pynkhih jar bad ïa ka jingïakhun la rai noh da ka tie breaker ban ïoh ïa ka rai khatduh.
Ha kane ka sngi, u President ka HYC Bah Roykupar Synrem u la long kum u Kongsan katba u Vice President Bah Donboklang Kharlyngdoh u la long kum u Symbud Kongsan.
Ka HYC ka la pynkup burom ruh ïa ar ngut ki samla ka jylla, kata, ïa u samla Niawki Ïakai uba lah wanrah burom ïa ka jylla ha kaba u la ïoh ban long u National Referee jong ka Wushu bad kum u Coach jong ka Jylla ha ka Wushu bad kynthup ruh ïa u samla Banteilang Jyrwa uba la wanrah burom ïa ka jylla kum u Champion Motor Cross Rider jong ka Ri.
Ïa ka khusnam la sam da u President bad u Vice President jong ka seng. Ïa ka khusnam Best goalkeeper la rah da u samla Wallamjingsuk Khongshun na ka Na Rympei FC, Best Player la ïoh da u samla Frezio Majaw na ka Tanaw FC bad ïa ka nam top scorer la ïoh da u samla Bankit Mujai na ka Nangïaikiew FC.
