Shillong, Naitung 07
Ka Uruguay ka la ïoh rung sha ka semi-final jong ka lympung Copa America hadien ba ka la lah ban pynliem noh ïa ka Brazil da 4-3 kol kaba la wan lyngba ka jingshut tie-breaker.
Haba phai sha ka jing -ïalehkai quarter-final ka-ba la long ha Allegiant Stadium, Las Vegas, ka jingïakhun ka la long ka-ba itynnad ha kaba baroh ar liang ki la ïakhun tyngeh naduh kaba sdang hynrei ym shym la don kiba lah ban pynkhih jar, haduh ba la hap rah sha ka tie-breaker ban ïoh ka rai khatduh ïa ka nongjop.
Ha kane ka jingïashut tie-breaker, u Manuel Ugarte u la khyrwit ïa ka kol jingjop bad pynlong ïa ka Uruguay ban rung semi-final, kata hadien ba ïa ka bol ba la shut da u Eder Militao ka Brazil la lah ban kyrda noh bad kumjuh ka bol ba la shut da u Douglas Luiz ka la leit dei beit-beit ha u dieng kol.
Baroh ar liang mamla ki la shem jingeh ban ïoh pynkhih jar ha ki jingïa-lehkai jong ki 90 minit bad ka Uruguay lei ka la hap ban ïakhun sa tang 10 ngut hadien ba u Nahitan Nandez u la shah beh noh na madan.
Hadien kane ka jingjop, mynta ka Uruguay kan pynhreh ban ïakhun pyrshah ïa ka Colombia, kaba la lah ban pynliem noh ïa ka Panama da 5-0 kol ha ka jingïalehkai kaba la long ha ka Sngi Saitjaiñ. Ka jingïakhun semi-final kan long ha ka Sngi Balang ha Char-lotte, North Carolina.
“Ka la long shisha ka jingïakhun kaba jwat na-mar ka dei ruh ka jingïa-khun pyrshah ïa ka kynhun kaba eh bha bad wat la ngi la duh uwei u rangïalehkai hynrei ngi la lah pat ban ïeng skhem haduh kaba kut,” la ong u nongap kol ka Uruguay u Sergio Rochet.
Ha kane ka jingïaleh-kai la ïoh ban sakhi ruh ba ka jingleh ‘foul’ ne leh bakla ka la long haduh 41 sien, ha kaba baroh ar liang ki la shem jingeh bha.
U rangïalehkai sha-khmat ka Liverpool u Darwin Nunez u la pynlehnohei ïa ka kabu ksiar ban khyrwit kol ïa ka Uruguay, hadien ba ka bol ba u la pyndei da ka khlieh ka la her nalor u diengkol.
Kumjuh ruh na ka liang u nongap kol ka Uruguay u Rochet u la lah ban ïada ïa ka bol kaba la shut da u Raphinha, ban khanglad ïa ka Brazil ban tam kol.
