Shillong, Naitung 11
Ka shi kol ba la thep khatduh da u Ollie Watkins ka la biang pura ïa ka England ban pynliem noh ïa ka Netherlands da 2-1 kol bad kan pynkhreh ban ïaknieh ïa ka nam lahduh pyrshah ïa ka Spain ha ka jingïakhun final jong ka Euro 2024 ka ban long ha Berlin.
Ha kane ka jingïakhun semi-final ka England kam shym la lah ban ïalehkai bha ha kaba tang mar ïa sdang u Xavi Simons u la ïoh ban pynkhih jar na ka bynta ka Netherlands ha ka minit kaba 6. Kane ka jingshah thep kol ka England ka dei na ka daw ka jingbym lah ban teh lakam u Declan Rice bad u rangapkol u Jordan Pickford um shym la lah ban khanglad na kane ka jingshah thep.
Hynrei kham hadien ka England ka la long kaba donbok ba ka la lah ban pynïakhaid kylla lyngba ka penalty ba la shut da u Harry Kane ha ka minit kaba 18. Kane ka la wan jia ha ka por ba utei u kapten ka Englang u dangpyrshang ban shut ïa ka bol sha kol, hynrei u la shah pynap ha u Denzel Dumfries hapoh ‘box’.
Kane ka jingïakhaid ka la pynlong ia kine ki kynhun ban ïakhun tyngeh bad haduh kaba kut jong ka kylla step kim shym la lah ban thep kol shuh. Dei hashwa ban kut ka jingïalehkai ba ka England ka la lah ban pynurlong lyngba u Watkins, uba la mih bujli ha jaka u Kane. Kane ka la hadien ka jingïarap pynbuh da u Cole Palmer ha ka minit kaba 90 bad kane ka la pynkyndit ïa ki rangïalehkai ka Netherlands kiba khlem lah shuh ban pynphai haduh kaba kut ka jingïalehkai.
Lyngba kane ka jingjop, ka England ka la khmih lynti ban khur ïa ka nam lahduh kaba nyngkong ha kane ka lympung ïalehkai kaba heh naduh ba ka la jop teng ha u snem 1966.
Kum ban shu pynkynmaw ka Spain, kaba la lah ban pynliem ïa ka France da 2-1 kol ha ka semi final kaba nyngkong. Te kumta ka jingïa-khun final hapdeng ka England bad ka Spain kan long ha ka 15 tarik mynta u bnai.
