Washington, Naitung:
U President ka US- u Joe Biden ha ka Sngi Palei u la pynbna ia ka jingnoh synñiang kaba heh jong ka US da ki tiar ïada suiñ na ka bynta ka Ukraine bad u la ong ruh ba ka Russia ka la pulom ha kane ka thma.
Haba pdiang burom ïa ki nongïalam jong ki ri kiba don hapoh ka kynhun NATO naka bynta ka jingïalang ba heh duh jong ka jingdap 75 snem jongka, u Biden u la ong ba ka America, Germany, Netherlands, Romania bad Italy kin pynbiang ïa ka Ukraine da ki tiar kiba khlaiñ bor bad kiba shyrkhei khnang ba ka Russia kan nym lah ban leh donbor ha Ukraine bad ka Russia kan hap beit ban mad ia ka jingrem bad jingduhnong ha kane ka thma.
Ha ki bnai ban wan, ka US bad ki paralok jongka ki thmu ban pynbiang ïa ka Ukraine da ki phew tylli ki tiar ïakhun nalor suiñ bad u la ong ruh da kaba bynrap ba ka US kan pynthikna ba haba ka ai ia kitei ki tiar iakhun sha ka Ukraine, ka Ukraine ka dei ban sngewthuh ba ka la jop lypa ia ka thma.
Kumta, u Biden u la ong ruh ba ki ri ka pyrthei kim dei ban sngewthuh bakla ne ka Ukraine ruh kam dei ban artatien, namar ka Russia khlem pep bad ym slem shuh kan sa khyllem jraiñ ha kane ka sien iakhun thma ba mynta lada ka Ukraine ka la ioh lut ia kitei ki tiar na kine ki ri.
Namar u la ong ruh ba ha ka jingleit hiar thma ba ar snem kynthih hapoh ka jingbthah jong u Putin, ka Russia ka la duhnong bun bad palat ia ka 3,50,000 tam ki shipai Russia kiba la iap bad mynsaw ha kane ka thma bad la jan shi million (10 lak) ki nong Russia, kiba bun na ki- ki dei ki samla, ki la mih noh na Russia namar ba kim ïohi shuh ïa ka lawei ha Russia.
Kumta ruh u Biden u la ong ba ka pyrthei baroh kawei ka tip ba u Putin un nym sangeh ia katei ka thma tang ha Ukraine, hynrei ymdei ban sgnewthuh bakla pat ba ka Ukraine hi kan sa lah ban pynsangeh ia u Putin.
Shuh shuh ruh u la ong ba ka thma Russia bad Ukraien kan sa kut noh shen bad ka Ukraine kan sa ioh long biang ka ri kaba laitluid bad kaba khlaiñ bor ynda ka la dep ban pynliem ia ka Russia ha kane ka sien iakhun thma ba khatduh jongka.
