Shillong, Naitung 12
Lai tylli ki skul na Ri Bhoi District ki la lah ban pynthikna ban jam sha ka final ha ka State Level Subroto Mukherjee Cup Football Tournament 2024 kaba la long ha kane ka nongbah.
Kine ki kynthup ïa ka Nongjri Presbyterian SS (U-15 Boys), Christian HSS (U-17 Girls) bad ka Myngken Christian HSS (U-17 Boys). Kiwei pat ki kynhun na kiwei pat ki district ki long ka Government Boys HSS (WGH) ha ka U-15 Boys, ka Kynshai Government L.P & U.PS (WKH) ha ka U-17 Girls bad ka North Liberty HSS (WJH) ha ka U-17 Boys.
Ha ka semi final jong ka U-17 (Girls) kaba la long ha SSA Stadium ha ka Sngi Thohdieng, ka Kynshai Govt. ka la pynliem noh ïa ka Tyrsad HSS (EKH) da 2-0 kol. Ïa kine la thep da ka Sinailin Shangrit (5) bad ka Younisha Thabah (38).
Ka North Liberty ka la shah rem noh ha ka Christian (Ri-Bhoi) da 0-3 kol. Ïa kine kol la thep da ka Streamlet Taro (7), Pynibha Rangthaluh (46) bad ka Daïamon Mawkroh (59).
Ha ka jingïakhun jong ka U-15 (Boys), ka Govt. Boys HSS (WGH) ka la pynliem noh ïa ka Assam Rifles Public School (EKH) lyngba ka tie-breaker 5-3 kol hadien ba ki la ïakhaid mar ar kol. Kumjuh ka Dominic English UPS (WJH) ka la shah rem noh ha ka Nongjri Presbyterian da 0-2 kol. Ïa kine kol la thep da u Changip Chettri (19) bad u Banteilang Malieh (50+1).
Haba phai sha ka semi final jong ka U-17 (Boys), ka North Liberty (WJH) ka la pynliem noh ïa ka Assam Rifles Public School lyngba ka tie-breaker da 4-2 kol. Katba ka Myngken Christian (Ri-Bhoi) ka la pynliem noh ïa ka Songsak Agitokgre (EGH) lyngba ka shi kol ba la thep da u Aliestar Thangkhiew (33).
