Shillong, Naitung 14
Ka India ka la lah ban pynliem noh ïa ka Zimbabwe da 42 run ha ka jingïalehkai kaba khatduh ne ka T20 kaba 5 kaba la long ha ka Sngi U Blei bad ban rah syndon ïa ka Series da 4-1.
Haba phai sha ka jingïalehkai ha kane ka sngi, ka India kaba la tied nyngkong lyngba ka 58 run ba la lah ban tied da u Sanju Samson, ka la lah ban kamai 167 run na ki 20 tylli ki over bad hap noh 6 wiket. Kiwei pat ki nongtied ka India ki la lah ban ïoh ka jingsdang hynrei kim shym la lah pat ban bteng slem bad duh noh ïa la ka wiket.
Haba beh ïa kane ka thong, ki nongtied ka Zimbabwe kim shym la lah ban shan hakhmat ki nongkawang bol ka India bad tang 3 ngut kiba la tied palat 20 run kata u Tadiwanashe Marumani, u Dion Myers bad u Faraz Akram bad ha kaba kut ka la lah ban kamai tang 125 run bad hap lut ki wiket na ki 18.3 over. U Mukesh Kumar u la khur 4 wiket bad ai tang 22 run na ki 3.3 over katba u Shivam Dube ruh u la khur 2 wiket na ki 4 over bad ai tang 25 run.
Ha kane ka jingïalehkai, u Shivam Dube u la khur ïa ka khusnam ‘Player of the Match’ hadien ba u la tied 26 run bad khur ruh 2 wiket, katba u Washington Sundar pat u la ïoh ban khur ïa ka khusnam ‘Player of the Series’ ne u rangïalehkai ba kynsai.
